إمبارح

لو تعرف إنت أد إيه جميل
جميل يا عبدالله جميل
سامحنى
إمبارح كان دمى تقيل
الشارع مبقاش زى الأول
يا ابنى
ماطرح ما نميل
ممكن نرتاح
بنفوت من زحمة لزحمة
يا عبدالله
وكأننا بنطارد أشباح
ابنى الصغير
يا الحتة الحلوة اللى ف قلبى
يا آخر العنقود
سامحنى
إمبارح راجع مهدود
زى عمود النور الخربان
شبه الصورة
اللى ف الصفحة الأولى
فى الجورنان
ومفيش بين كل العناوين
عنوان واحد للأفراح
عارف
كل ما عينى تقع
على شهادة النجاح
أرجع أبص عليك
وع الشارع
أعرف إنها ورقة
زى بقيت الورق اللى أصفر
ومات ف مكانه وراح
هات حضن لبابا
يا عبدالله
عشان أعرف أضحك
من قلبى
وأقدر أبص ف وشك
صعب يا عبدالله
تبقى أنت
الحتة الطاهرة اللى ف قلبى
وأغشك
سامحنى