أزهى عصور الحرية.....بعافية شوية

قرار حكومتنا النظيفة بسحب أرض مدينتي من مجموعة طلعت مصطفى تنفيذا للحكم القضائي ثم إعادتها لها مرة أخرى .. يثبت فعلا أن الحكومة بتتعامل معنا بمنطق الأم الحنون اللي بتخاف على زعل أطفالها اللي هم إحنا فبتريحهم .. بس برضة بتعمل اللي هي عايزاه!!!!
الحكم القضائي أثبت أن عقد مدينتي باطل و غير منطقي و لابد من فسخه .. طبعا الناس المغفلين أمثالنا كده هللوا للحكم ده باعتباره إنتصارا للمنطق و مكافحة الفساد وأحسوا أنهم وضعوا الحكومة في مأزق، فهي مطالبة بتنفيذ هذا الحكم القضائي و في نفس الوقت دي برضة مدينتي و هشام طلعت .. طيب الحل إيه؟؟
طبعا الموضوع دة كان محتاج (ترتيب من مخ ديب) .. و طبعا ثغرات القانون مفيش أكثر منها...!!!
تفتق ذهن قانونيى الحكومة إلى حل سحري للخروج من المأزق .. تنفيذ حكم القضاء (فالأحكام القضائية واجبة النفاذ...و للقضاء قدسيته و حرمته ... إلخ) و سحب أرض (مدينتي) من مجموعة (طلعت مصطفى) تنفيذا لحكم المحكمة...!!!
بس برضه القانون بيعطي الحق للحكومة في تخصيص الأراضي بالأمر المباشر بدون مزايدات، و بالتالي فقد قررت تخصيصها لمجموعة طلعت مصطفى برضة ..
و بكدة يبقى توتة توتة خلصت الحدوتة .. و يا دار ما دخلك شر .. و يجعل بيوت المحسنين عمار .. و ربنا يخلي لنا الدماغات (الألماظ) اللي بتطلع منها الأفكار و الحلول السحرية دي!!
و كما كنت!!!!!
********************************
الأزمة التي أثارتها إدارة مدينة الإنتاج الإعلامي مع أوربت بشأن مستحقات و مديونيات غير مسددة هي بكل تأكيد و بدون أدنى شك تلكيكة وكمين تم نصبه لبرنامج (القاهرة اليوم) لعمرو أديب.
يبدو أن (حنفية) حرية الرأي و التعبير و اللي صدعونا بيها الكام سنة اللي فاتوا آن الأوان إنها (تتقفل) و بالضبة و المفتاح!!
و سواء عاد (القاهرة اليوم) للحياة مرة أخرى أو لم يعد فالهدف قد تحقق .. و سواء أكانت (قرصة ودن) أو (رصاصة رحمة) فعلى كل اللي صدقوا أنفسهم أننا نعيش في (أزهى عصور الحرية) أن يفوقوا ويصحصحوا ويخافوا على أكل عيشهم ..!!!
********************************
بمناسبة الخوف على (أكل العيش) .. المهندس نجيب ساويرس خاف على أكل عيشه و قرر منع برنامج (إبراهيم عيسى) على on tv و طبعا السبب (المعلن) كان تفرغ ابراهيم عيسى لتطوير جريدة (الدستور) (اللي أعتقد انه هيسيبها قريبا برضة للتفرغ لمشاهدة التليفزيون).......
إنما أعتقد أن الموج (الأمني) عالي قوي اليومين دول .. و سلومة الأقرع ما بيعرفش صاحبه .. و الناس لها حق تخاف على مشروعاتها و استثماراتها و أكل عيشها بدل ما يلاقي نفسه (مفلس) و (متجدولة ديونه) .. و ساعتها لا إبراهيم عيسى و لا 10 زيه هينفعوه!!!!
********************************
بيع جريدة (الدستور) - و ما ادراك ما هي الدستور - للدكتور سيد البدوي رئيس حزب الوفد و صاحب مجموعة قنوات الحياة (1 و 2 و مسلسلات و سينما و سبورت) لتنضم هذه الجريدة (اللي كانت شرسة) لهذه الباقة الإعلامية الترفيهية اللطيفة اللي بيملكها رئيس حزب معارض من بتوع (المعارضة اللطيفة) برضة...يجعلنا مقدما نترحم على جريدة معارضة اسمها (الدستور) ستتحول الى جريدة (لطيفة) برضة!!!!
********************************
غياب (القاهرة اليوم) و إبعاد (ابراهيم عيسى) و (تقليم أظافر) جريدة الدستور....و ما خفي كان أعظم يثبت أن (أزهى عصور الحرية) بعافية شوية!!!!