كلمات.. فى الجون

■ فى ماتش مصر والجزائر بنرحب بكل زائر..
تعالوا مصر بلدكم من غير فيزا وتذاكر.. مصر شعبها طيب مضياف دايماً وشاكر.. هانروح وروحنا حلوه ونجيبكم من المطار.. هانروح ونستناكم ولو طال الانتظار.. انتوا برضك ضيوفنا ومصر حلوه وعمار.. ومنتخبنا شاطر جاى المباراة مذاكر.. هانروح ونشجعه أنا ومحمود وياسر.. لو جبنا جون هانفرح ولو فينا هانقول ياساتر.. أنا عاوز أقولك حاجه حتى لو كنت فاكر.. الفوز هايكون عربى سوا مصر أو الجزائر.
مصطفى ممدوح محمد
فيصل - الهرم
■ بلاش نلعبها لو هتخلينا.. نزعل كده ويَّا بعضينا.. وبدل اللعب بفن وحب.. تقلب خناقة شتيمة وضرب.. وتقف الدنيا تبص علينا.. لأ لأ لأ... لأ يا أهالينا!!.. يا بنى ياخويا كنت صغير.. لما وقفنا كبير وصغير.. فى وش الظلم عشان نتحرر.. وبدم الشهدا روينا أراضينا.. معقولة ماتش ييجى ينسينا.. لأ لأ لأ... لأ يا أهالينا!!.. يابنى يا خويا لو ناسى أنا فاكر.. قيمة مصر وقيمة الجزائر.. اللى مابينا تاريخ يتذاكر.. وأمل فى بكره ييجى يرضينا.. وعمر ما ماتش هاينسينا.. لأ لأ لأ... لأ يا أهالينا.. علشان كورة تيجى جون.. نخسر بعض دا يبقى جنون.. يلا بينا نفوق من الوهم.. إحنا شركا فى مليون هم.. ولينا أحلام أكبر وأهم.. يلا نبنى سوا يا أهالينا!!
رفعت أبوسنان - المحامى
abo_senan@yahoo.com
■ السبت دا يوم جديد.. يوم بجد بجد عيد.. والقلوب فيها أمل.. بالأمل مطمنة.. ناس بلدنا مؤمنة.. إننا ف وقت المحن أدها وأدود.. ما هو أملنا فى ربنا ملهوش حدود.. النهارده ف البلد حالة تحدى.. الصغير والكبير.. الغنى ويّا الفقير.. كلهم بيقولوا لازم مصر تكسب.. لازم الأزمة تعدى.. مش عشان 90 دقيقة.. الحكاية أن بلدى عايزة تفرح.. عايزة تفرح.. بأى طريقة.. كلنا للسما رافعين إيدينا.. والأمل ساكن ف دعوة كل قلب.. مسلم - مسيحى.. كلنا بنقول يارب.. يارب النصر لمصر.. كل مصرى نفسه يعمل أى حاجة.. بس مصر تبات منصورة.. بُكره.. مش مجرد ماتش كورة!!
مينا مجدى استمالك
■ الله على.. مبادرة.. وردة لكل لاعب جزائرى.. شىء عظيم نهواه.. سبّاقة دايماً.. فى مبادراتك لخدمة البلاد.. فى كل اتجاه.. نؤيد مبادرتك.. فى إزالة التعصب الرياضى.. بين أخ وأخاه.. مليون تحية.. لرئيس التحرير الذى بادر بهذا العمل وتبنّاه.. الله عليك يا «المصرى اليوم» صاحبة رسالة.. خالصة لله.. منبر للقراء.. ما هى كلمة الحق عبادة.. والعبادة مش بس صلاة.. الساكت عن الحق.. شيطان أخرس.. من صلب الدين اتعلمناه.. مقدّرين دورك الرائع.. رغم هول المواقف.. وحجم المعاناة.. الله عليكِ.. كل يوم مبادرة جديدة وحملات عديدة وخبر جديد نقراه.. فيكِ فريق عمل.. عظيم وفريد بالمصداقية والشفافية.. ربنا أعطاه.. رائدة التغيير.. فى بلدنا..
من أجل مجتمع صالح ينعم بالحياة.. أى حدث جارى.. حتى الرى بمياه المجارى «المصرى اليوم» غطّاه.. الله عليكِ يا «المصرى اليوم» دستور عمل.. ونبراس حياة.. تصنعين المعروف.. وصانع المعروف فى محراب عبادة.. خالصة لله.. الصدق فيكِ.. والشرف ليكِ وفريق العمل.. لكلمة الحق الرب هداه.. سيرى فى طريقك سيرى.. النجاح ليكِ والشرف ليكِ.. بفضل الله.
فؤاد عبدالرازق
 موجه صحافة بدرجة مدير عام سابق - إسكندرية