فى شأن الضريبة العقارية

«يوسف بطرس» يا ابن الغالى            لو تسمح لى أعُك شوية
وإن مسمحتش الله يعوض                   ع اللى حايجرى بالتبعية
إنت وزير الدولة وحقك                      يبقى قرارك فوق رقبينا
ما إحنا ولاد البطة السودة                    اللى عليهم روبة وطينة
إنت عليك تركب وتدلدل                     رجلك فوق الخلق يا سيدى
أو تفرسنا بأى ضريبة                        وتجرجرنى وتملك إيدى
جاى تتقنصل على شقتنا                     اللى بنيتها بعرقى ودمى
وتقول حاخد عنها ضريبة                   خدها يا سيدى وزود همى
ليه بتعكر دمى يا فندى                        وتبهدلنا وتمحى الأسرة
علشان أدفع وأدفع وأدفع                     وأدفع عمرى وأموت م الحسرة
مين بالذمة فى كل زمايلك                   جاب إقراره وقالك عندى
مين راح يدفع منهم «ميلم»                 قول وأنا راضى الذمة يا فندى
طب إيه رأيك أنا مش دافع!                 ياللا احبسنى وحدد سيرى
واحبس غيرى وغيرى وكوش             علشان يبقى فى إيدكو مصيرى
والله أنا خايف تعملوا فردة                   ع الأموات والناس الماشية
فكرة جريئة ياريت تعملها                    علشان تسعد باقى الحاشية
حلمك واسع والله يا باشا                       بس انشا الله حايبقى حقيقة
إوعى تخاف م الشعب الطيب                 ما إنتو الصفوة وإحنا البيئة
سامى البدوى - عضو اتحاد الكتاب