شهود أحداث دهشور: شقيق «المكوجي» هدد المتواجدين بإحراقهم وألقى «المولوتوف»

واستمعت النيابة إلى أقوال شهود الواقعة، حيث أكد أحدهم أن المكوجى أغلق مسكنه وصعد إلى السطح مع شقيقه وأنهما تبادلا الشتائم مع «أولاد رمضان» - أصحاب القميص المحترق - ثم ألقى شقيق المكوجى زجاجات المولوتوف من أعلى سطح منزلهم على المتواجدين.
وسألت النيابة الشاهد بعد أن أقسم
■ ما اسمك؟
- اسمى عبدالنبى سيد حسن نقاش
■ ما معلوماتك حول الواقعة؟
- اللى حصل أنا عندى محل جنب بيت سامى يوسف وبعد ما طلعت من صلاة العصر لقيت صوت عالى وخناقة بين عماد رمضان سيد واخواته وبين سامح سامى يوسف، ولما رحنا عند البيت لقينا سامح بيقفل باب بيتهم وطلع فوق السطح وقام سامح وإخواته رموا زجاجات على الأرض ولعت وعملت لهب ووقعت زجاجة على معاذ وحرقته وده اللى حصل.
■ من كان برفقتك داخل المسجد؟
- كان فى ناس كتير ومن بينهم معاذ.
■ هل شاهدت من الذى قام بإلقاء زجاجة المولوتوف الأخيرة التى سقطت على معاذ؟
- لا.
■ هل شاهدت من الذى قام بإشعال النيران فى منزل المتهمين؟
- لا إحنا لقينا دخان كتير طالع من جوه البيت.
■ هل تمكنتم من معرفة مصدر الدخان؟
- لا معرفناش مصدر الدخان.
■ هل كان ثمة أشخاص آخرون تشاجروا مع سامى يوسف وإخوته؟
- لا هو عماد وإخواته اللى اتخانقوا وبعدين الناس اتجمعت على صوت الخناقة والناس اتجمعت أكتر بعد معاذ ما اتحرق.
■ ما علاقتك بكل من أحمد رمضان سيد وباقى المتهمين؟
- إحنا بلديات ومافيش بينا خلافات.
■ ما علاقتك بالضبط بسامى يوسف نسيم وإخوته وهل هناك خلافات بينكم؟
- مافيش علاقة ولا خلافات.
■ هل لديك أقوال أخرى؟
- أيوه أنا عايز أقول إن إحنا حاولنا نهدى الطرفين بس محدش منهم هدى.
واستمعت النيابة إلى أقوال الشاهد الثانى وسألته
■ ما اسمك؟
- اسمى سعيد على محمد محمد لحام.
■ ما معلوماتك حول الواقعة؟
- اللى حصل إنى كنت نايم وصحيت على صوت زعيق وطلعت أشوف الحكاية لقيت خناقة بين أولاد رمضان سيد وبين أولاد سامى يوسف نسيم وكانوا بيسبوا الدين لبعض، وبيشتموا بعض وكان فى ناس كتير بتسلك بينهم، وبعدين ولاد سامى طلعوا فوق السطح ورموا زجاجات مولوتوف واحدة منهم وقعت على معاذ.
■ هل قام المتهم وائل بتهديد المجنى عليه معاذ بإلقاء تلك الزجاجات.
- أيوه هو هدد الناس وقال إنه هيولع فيهم.
■ وما الذى بدر من الأهالى حال تهديدهم؟
- هما طلبوا منه عدم إلقاء تلك الزجاجات لكنه لم يستجب لهم.