ناس ذوق ذوق ذوق

حضرتك بقالك قد إيه بتسمع عن موضوع قرارات العلاج على حساب صاحب المحل؟ شهر أو أكثر قليلا؟ هل حضرتك سمعت أن حصانة هؤلاء النواب قد اتخلعت أو اتلبست تمهيداً للتحقيق معهم؟ طب هل حضرتك سمعت عن تحقيق ما تم فى أى حتة عن موضوع جزيرة آمون؟ متأكد إنك ماسمعتش؟ طب دورت تحت السرير؟ برضه مفيش تحقيق؟!.. قولى بقى، ألم تلاحظ أنه الآن قد صار من المعتاد والعادى أن يكون هناك فاصل زمنى طويل بين الإعلان عن الفضيحة والتحرك الرسمى للتحقيق فيها؟.. تماما مثلما حدث عند الكشف عن مخالفات وزير الإسكان السابق..
 فى البداية يفجر النائب من دول القضية تحت قبة البرلمان وتتناول الصحف الموضوع فى اليوم التالى، أما جهات التحقيق فهى لا حس ولا خبر.. من فضلك إوعى تقول إن هذا الفاصل الزمنى هو لإعطاء الفرصة لترتيب الأوراق إلى آخر هذه الافتراءات، ده فاصل للإعلانات.. وحلنى بقى على ما يتفتح التحقيق.. بصراحة هو مش بيكون تحقيق قوى لكن تقدر تقول بيبقى قعدة بلدى كده، حيث المشار إليه بالإدانة يذهب لسؤاله فيما نُسِب إليه.. خلّى بالك أنه لا يخضع لتحقيق.. يعنى الموضوع لا يتعدى الدردشة.. يقولّنا رأيه ونقولّه رأينا ويرضيك يا عمدة؟ لأ مايرضينيش. ويصح كده؟ لأ مايصحش. طب قول لحمادة يبطل يلعب.
 حاضر هاقوله وسلامو عليكو عليكم السلام من غير محاضر ولا يحزنون.. حاجة وِدّى كده.. الأهلى مع أرسنال.. لذلك أعتقد أن نفس الشىء سيتكرر فى موضوع قرارات العلاج، فحتى الآن لم تُرفع الحصانة عن النواب رغم أنه من الممكن رفعها فى يوم وليلة، وممكن يكون يوم جمعة مثلما حدث مع أيمن نور.. طيب هل عند حضرتك تفسير لهذه الحنية فى التعامل التى نراها الآن؟ لو سمحت لا داعى لأن تقول إن هذا فساد وتستر على فاسدين، إلى آخر هذا التنابز بالألفاظ، فأنا أعتقد أن كل ما فى الأمر أن الله قد أنعم عليك بحكومة ذوق ذوق ذوق، وأنت كالعادة جاحد للنعم، لذلك فأنت تسىء تفسير هذا الذوق على أنه فساد وتستر على فاسدين!..
أصل بينى وبينك طالما النية فى الأصل خير، برضه ربنا بيسترها.. ونواب العلاج كانوا بالأساس نيتهم خير، وناس ذوق ذوق مثل حكومتهم، لذلك أنا أتعجب ممن يستنكرون استخدام قرارات العلاج لأمراض غير منصوص عليها.. طب بذمتك يا شيخ من الأولى بالعلاج: مريض القلب والسرطان أم الأصلع واللى محتاج، شفط دهون؟ أولاً مريض القلب أو الأورام غير مصرح له طبيا بالزواج لكن الأصلع واللى عنده دهون لسه عنده أمل.. ثم إن مرضى القلب والسرطان كل الناس بتدعى لهم بالشفاء، إنما عمرك سمعت حد بيدعى للأصلع الغلبان أو للمسكين اللى عنده دهون؟
 ده غير إن الأصلع واللى محتاج شفط دهون وارد إنهم يكونوا مثار سخرية الآخرين فى كل مكان، لكن هل عمرك سمعت عن أحد يسخر من مرضى القلب أو الأورام؟.. يبقى مَن الأولى بالعلاج على حساب الدولة؟.. ثم إنت ناسى إن هذا الأصلع واللى عنده دهون مصر تبقى أمه؟ إنت عمرك طلبت من مامتك إنك تروح تحلق شعرك أو إنك عايز تخس وقالت لك لأ؟ يا سلام بقى لو تطلع قرارات على نفقة الدولة للمانيكير والباديكير أهو كده تبقى مصر هى أمى بصحيح!