تميم البرغوتى .. و قصائد جديدة لم تنشر من قبل (1) .. حتى همومك واقفة فى صفك

عايز تقول إيه يا وَلَدْ ماْ تْقُول
شايل على ظهرك جَبَلْ منقول
وِسَمَا عَلَى سِيفْهَا كِدَه بِالطُّول
كَمَا لُوح قِزَازْ مَسْنُودْ عَلَى كِتْفَكْ
وِنْجُومْ فيْ كِيسْ نَاْيْلُونْ بِيِتْمَرْجَحْ
حَالِفْ يَمِينْ مَهْمَا حَصَلْ تِفْرَحْ
ماشِى عَلَى المكتوبْ عَلَى الأَرْجَحْ
وَكَأَنَّما بْتِتْمَشَّى فى كَفَّكْ
قَالُوا مَصِيرَكْ فى خُطُوط كَفِّيكْ
يعنى بِشَكْلٍ مَّا المصير فْى إدِيكْ
مَغْزَلْ خُيُوطِ الهَمِّ مِنْ حَوَالِيكْ
بِتْلِفّ فِيها وْهِيَّ بِتْلِفَّكْ
شَايِلْ بِلادَكْ مِنْ بِلادْ لِبْلادْ
يَا حَدِيثْ شَرِيفْ مَاشِى بِلا إِسْنَادْ
لَكِنْ جَمِيلْ لَوْ يِتْقِرِى يِتْعَادْ
حُسْنَكْ صَبَحْ فِى وِحْدِتَكْ إِلْفَكْ
عَاشِقْ صِفَاتُه يَا وَلَدْ مَوهُوم
لكنُّه وَهْمِ مَاْ يِسْتَحِقِّشْ لُوم
قُرْآنْ وِنَازِلْ فِى بِلادِ الرُّوم
يِلْعَنْ أَبُو اللى رَآكْ وِمَا عِرْفَكْ
فى الغُرْبَة حَاطِطْ عَ القَصِيدَةْ عَلَمْ
وِحَاْرِسْهَاْ بِالسِّلاحينْ عَلَمْ وِقَلَمْ
تِبْنى وِتِهْدِمْ فى القَصِيدَة أُمَمْ
واللى يْعَاْدِيكْ جُوَّاهاْ بِيحَالْفَكْ
باللى مَلِيتْ الغُرْبَة بِالأَوْطَانْ
والموت دَلَقْت عَليه عِلَبْ أَلْوَانْ
والعَدْل زَى القَافْيَةْ وِالأَوْزَانْ
خَاطْفُه عَلى مُهْرِ الهَوَى وْخَاطْفَكْ
هَمَّكْ بِيِنْحَتْ فِيك وِبِيشَكِّلَكْ
بِيِشِدّ فِى قْيُودَكْ وِبِيفُكِّ لَكْ
دَه طَائِرِ الرُّخِّ الليْ بِيأَكِّلَكْ
وَهَيِلْحَقَكْ لَوْ رَاْحْ فِيْ يُومْ حَاْدْفَكْ
يَا فَجْرِ مِتْحَاصِرْ فِى نَاحْيِةْ غَرْبْ
الدُّنْيَاْ ضَاقِتْ وِاسْتَفَاضِ الكَرْبْ
لَكِنْ إِذَا اْرْتَفَعِتْ رَاْيَاتِ الحَرْبْ
تِلْقَى هُمُومَكْ وَاقْفَةْ فِى صَفَّكْ