بهوات ولا شوارعية .. ماتفرقش

ناس كتير مستغربين اوي من التصرف الهمجي المتوحش ، ومذبحة القطط في نادي الجزيرة !!
ناس بتقول ان البلطجي اللي قبض فلوس علشان يسمم القطط ، ويضربها بالشوم في نادي الجزيرة، مايفرقش عن عضو مجلس إدارة النادي، اللي دفع له فلوس وسهل له مهمته داخل النادي! بهوات ..ولا شوارعية ..ماتفرقش ..
وناس شايفه ان المشكلة تفاقمت في النادي بشكل متوحش، وأنك لو فكرت تاكل طبق في اي مكان فى النادي القطط لازم هتنط في قفاك - ودا حقيقي بالفعل. وحصل معايا شخصيا - وانه مشكله كان لابد من حلها...
وناس دمها خفيف .. بتقول طيب أدوا القطط مخدر وبعدين لموهم وهما مخدرين وسيبوها في مكان تاني!! او اعملوا للإناث منهم عمليات تمنع الخلف !!
وناس شايفه ان ماحدث في النادي ، تصرف مجنون يخلو من الانسانية والرحمة في التعامل مع الحيوان..
الحقيقة ان ماحدث في نادي الجزيرة مع القطط ، لا يختلف كثيراً عما يحدث في مجتمعنا الان ، يعني ببساطه كل من يخالفك الرأي ، او يحتج علي ما تقوم به ، او يضايقك بتصرف لايتمشي والنظام السائد ، سهل جداً التخلص منه بالاعتقال او السجن ، وممكن يموت من التعذيب كمان في القسم او السجن ويبقي خلصنا منه .. ومش مهم يموت اي عدد ، او يتعملهم مدبحه ..مفيش مانع بس الباقي يعيش في هدوء ! .
والباقيين المعترضين يتقال لهم ببساطه برضو اخرجوا من البلد وخلصونا .. امشوا وبلاش دوشه ..
ثقافة التخلص من الآخر المعارض .. صاحب الصوت العالي .. يخرس ، وصاحب الكلمة الجريئة الحرة .. يبعد ، وصاحب الفكر المخالف .. يقتل..
دي الثقافة السائدة سواء عضو نادي الجزيرة ، او ساكن منطقة عشوائية .. ثقافة البقاء للاقوي ..وشريعة الغاب ..والثقافة الحيوانية ...
انها ثقافة المجتمع الان .. قد تبدأ بذبح القطط .. وتستمر بعدها لذبح الناس بعضهم لبعض...
مظاهرة تعترض على ذبح القطط امام نادي الجزيرة
مظاهرة تعترض على ذبح القطط امام نادي الجزيرة