عمري 20

من أرخم الأحداث فى الكون لما يطلب منك حد إنك تكتب عن حاجة مطلقة وإنت مفكرتش تكتب قبل كده خالص وكمان عمرك ما جربت تكتب من دماغك وأنت متعود على موضوعات التعبير السخيفة بتاعة امتحانات العربي. والمصيبة الأكبر إن "التعبير" فى امتحان العربى .
والمصيبة إني اكتشفت إنى لازم اكتب موضوع من 300 كلمة. نرجع لموضوع التعبير الرخم طالما أنا مزنوق فهو طريقى الوحيد حاليا. كان دايما يطلبوا مننا نكتب موضوعا كبيرا من صفحتين ولو كان أربعة يكون أحسن، طيب أنا ممكن ألخص وأجيب من الآخر واكتبه فى نص صفحة وهيدى نفس المعنى، لكن إزاى الأهم عدد الصفحات مش مهم اذا كنت بتقول كلام مهم أو لأ!! بذمتكوا مش حاجة رخمة؟ انتو معايا ولا إيه؟ هى دي كانت مشكلتى مع التعبير ولأن أنا بكره الكتابة الكتير كان دايما سؤال التعبير هو أكبر مشكلة عندي. تخيلوا بقى إن النحو كان بالنسبة لي سهل جدا وده رأيى شوفوا إنتم بقى إيه رأيكم؟
أحمد أيمن محمود .18 سنة
مساحة للشباب من عمر 15 الى 20 عاما
almash_had@yahoo.com
(العدد الأول 22 يناير 2012)