بالفيديو..قصيدة ساخرة ل باسم يوسف تنتقد "سلق الدستور "

في إطار الجدل حول الدستور قام مقدم البرامج التلفزيونية باسم يوسف بتقديم قصيدة عبر الهواء مباشرة عبّر فيها عن موقفه من الاستفتاء وتحديدا من استعمال كلمة "نعم " بدءا من عهد الرئيس السابق حسني مبارك وحتى اللحظة التي تسبق الاستفتاء على الدستور الجديد.
وتقول كلمات القصيدة التي عرضها باسم يوسف مباشرة على المشاهدين:
"نعم" بتريح مش كدة؟؟
"نعم" حلوة كيوت لطيفة قمورة
"نعم" بتجيب استقرار.. "نعم" بتودي الجنة زي ما جابت استقرار وودتنا الجنة ونزلت علينا رضا ربنا
صح؟ قول "نعم" مالها نعم؟ ما هي اتقالت قبل كدة جابت أيه؟؟؟
جابت هم جابت غم وجابت معاها مسودة!!
دستور مصر اطلسأ وأنتم كلكم نايمين ع المخدة
قعد يلاعبك ويحاورك في كل مادة
وبعديها يقولي دستور.. قول نعم يا أخي علشان العجلة تدور
واللي مش عاجبه في ستين داهية يغور
اسمع كلام أخوانك وخليك قمور
بس أنا معدتش باكل من الكلام دا أنا خلاص مخي طق
أنا هنزل الاستفتاء وبعلو صوتي هقول لأ
قولوا علينا أقلية مفسدين عملة مأجورين
فلول ومسيحيين ضد الإسلام ومش مسلمين
ماشي يا سيدي اشتم براحتك وشوه كمان
افرح بحشدك بأغلبيتك وجاريك على البرلمان
ما هي أقليتنا ديه هي اللي بدأت الثورة ووصلتكم لفوق
نسيتوا أصل يعني مكنش من زمان
انبسط يا سيدي بدستورك المسلوء
وانسى جريك ورانا وكلامك معانا بالزوء
وقلبتك السودة علينا مش جديدة عليكم
ولسة منكوا ياما هندوء
ما اللى قبلك بردك كان بيعمل اللى ع مزاجه وكله بالصندوق
افرح انت بدستورك واحشد ضلل كمان
افرح بنعم وطلع فينا اللى اتعمل فيك من زمان
اكذب وحور واضحك علينا بالاستقرار والامان
اصله انتوا عارفين آفة بلدنا النسيان
أنا بقى مش ناسي هلف على الناس في كل مكان
وهحط 3 كلمات على كل لسان
خان.. يخون.. وكملو انتوا بقى.
شاهد الفيديو