يوميات دكتور متعذب.. العيان الكذاب!

=خير يا حاجه ألف سلامه عليكي ؟
-خير يابني أن شاء الله..كنت عاوزه اخلع ضرسي عشان ملخلخ ومش عارفه اكل منه
=تمام يا حاجه.. طيب عندك أي مشاكل صحيه أي أمراض ؟! بتاخدي ادويه ؟! عملتي عمليات قبل كده ؟!
-اه عملت...عملت قيصريه
=يا حاجه انا قصدي عمليات قريب..قيصريه دي من 40 سنه على الأقل
-لا..كله تمام الحمد لله.....بمب هيهيهي
=طيب يا حاجه.. افتحي بقك عشان اديكي البنج
***بتفتح بقها وبتاخد حقنه البنج... وبتحس أن شفايفها ولسانها بدءوا ينملوا فبنبدأ نشتغل
=خلاص يا حاجه الضرس طالع اهو...بس ثواني هنشف عشان فيه دم كتير اوي طلع مره واحده
-براحتك يابني... معلش يمكن عشان انا عندي نسبه سكر بسيطه
=ايه ؟! سكر !! ونسبه بسيطه ازاي ؟!
-يعني كنت قايساه أول امبارح كان 450
=احيه !! طب ومقولتيش ليه ياحاجه !!!!!!! انا مش سألك؟
-مجتش مناسبه وبعدين نسيت
=مجتش مناسبه!! خلاص يا حاجه...هنكمل بقي وربنا يستر ونديلك مضاد حيوي قوي بعديها
-تمام يابني... اتكل على الله...
** بيخلع الضرس...ونافوره دم... بتطلع **
=يا حاجه انتي عندك الضغط ولا حاجه ؟
-نسبه بسيطه يابني الحمد لله
=يادين النبي...بسيطه دي اللي هيا كام ؟
-قسته امبارح كان...190 على 110... بس الحمد لله الرقم اقل من نسبه السكر بكتير
=الله يخربيتك يا حاجه...ده رقم وده رقم تاني خالص... انتي كده ضغطك على جدا...انتي كده لازم تروحي لدكتور باطنه...ياحاجه كده خطر عليكي الله يسامحك
-ياحبيبي يا ابني...انت خايف عليا
=ياستي خايف عليكي ايه بس...ماتموتي ولا تتنيلي...انا خايف على مستقبلي اللي هيضيع لما تفيصي هنا عندي في العياده
-العمر واحد والرب واحد وياما دجت على الرأس طبول
=طيب يا حاجه...عضي على كيس القطن ده لحد ماتموتي..قصدي لحد ما الدم يقف...ولو موقفش...انتي ولا شوفتيني...ولا خلعتي عندي...انا زي أولاد احفادك برده ياحجه
-حبيبي يا ضنايا... اصل انا كنت خايفه اقولك اللي عندي مكنتش ترضي تخلعلي زي بقيه الدكاتره اللي روحتلهم
=لا ياحاجه حصل خير...هما ربنا بيحبهم...وانقذهم وانا اللي لبست فيها..مفيش مشكله انا عارف حظي
=اتفضلي يا حاجه ده مضاد حيوي...قوي عشان مايحصلش أي مشاكل بعد الخلع
-حبيبي يابني...المهم يكون مبيأثرش على الكبد...عشان عندي الكبد يا حبيبي
=ماكلنا عندنا الكبد يا حاجه...عندك ايه في الكبد يعني ؟
-فيرس سي باين...أو بي...والله مافكره يابني...هو انا عقلي دفتر
=حبيبتي يا حاجه......انا عاوز اعرف انتي معندكيش ايه بس... معندكيش الايبولا بالمره عشان نموت سوا هنا ؟!
-مش عارفه يابني والله بس عندي الفوار أبو 2 جنيه.... هو ده" الايبله" ولا غيره؟
= "ايبله" ايه بس... متاخديش في بالك يا حاجه الايبولا دي فيتامينات
-اكتب عليه وانا اجيبه ياضنايا مش هيخسر
**بيخلع الجوانتي والماسك والبالطو...بيجهش بالبكاء حسرتا على ضياع مستقبله مع المرحومه...وبيجري على البيت ينام عشان هيتعرض على النيابه بكره الصبح بدري.