كيف تصطادين عيدية!

عزيزتى الفتاة اللى انت خلاص مابقتيش طفلة وبالتالى ماحدش هيديكى عيدية سواء بابا وماما او الاهل والاقارب، وكمان مش مخطوبة..فمفيش فارس همام هيجى يديكى بوكية ورد وعلبة كحك وآباد هدية ومبلغ وقدره عيدية!
يعنى ببساطة اتقفلت معاكى على الاخر وجفت كل الموارد وماحدش هيديكى حاجة، علشان كدة هديكي نصيحة يمكن من خلالها ربنا يكرمك وتاخدى لك اى حاجة تقدرى تتفشخرى بيها قدام صحباتك بدل ما تبقى محرجة قدامهم !
*لو ليكى اخت اكبر منك مخطوبة او متجوزة، لازم تلمحى من بعيد لبعيد لجوزها او خطيبها زى مايكون انك بمثابة حماته وان ليكى حق عليه زيك زى اختك بالظبط فمثلا تقولى له "كل سنة وانت طيب ياترى محضر لحماتك الصغيرة عيدية اية السنة دى" طبعا انت كدة كسفتيه وبالتالى هيعمل حسابه فى عيديتك، اما بقى لو كان من النوع اللى مش بيحس، لازم فى الحالة دى تكونى شريرة وتصارحى اختك انه لو ما اخدتيش عيدية من خطيبها هترخمى عليهم وتوسوسى لللاسرة انهم مايخرجوش لوحدهم فى العيد ابدا!..طبعا هى هتبلغع بسرعة واتقاءً لشرك هيديكى فوراحتى من قبل العيد!
*الاخ الكبير: ديما الاخ الكبير بيحس ان اخته مهما كبرت بتفضل صغيرة، ومن هنا لازم يكون هو اقرب شخص ليكِ، لازم تدلعى عليه وتحسسيه انك ديما منتظرة منه يعاملك كطفلة، وبالتالى هتفضلى محتفظة بحقك فى العيدية حتى وانت عندك 50 سنة!
*بابا وماما: لازم تقعدى فى العيد مبوزة ومنكوشة الشعر ومتضايقة ..طبعا داه يثير فضولهم وهيبقوا نفسهم يعرفوا فى اية، بمنتهى الهدوء قولى لهم مفيش حاجة انا بس مش حاسة اصلا بأى عيد ..طبعا هتصعبى عليهم وهتكون أحد آلياتهم لإسعادك هى إعطاءك عيدية محترمة
عزيزتى ان لم تستطيع الحصول على اى عيدية عبر الوسائل السابقة ..اعرفى انك نحس!