أسما شريف منير تعلن زواجها برسالة خاصة "كلمت ربنا كتير وكان عندي يقين إنه هيعوضني"

احتفلت أسما شريف منير، نجلة الفنان شريف منير بزفافها، وذلك خلال الساعات القليلة الماضية، وسط حضور للمقربين والأصدقاء.
رسالة أسما شريف منير
ونشرت الفنانة أسما شريف منير رسالة احتفالا بزفافها، على صفحتها الشخصية على موقع تبادل الصور والفيديو إنستجرام، لتشارك بها جمهورها.
وجاءت في الرسالة: "⁨ ⁨ ⁨أنا الحمد لله اتجوزت، وده قرار جه بعد فترة طويلة من رحلة عشتها مع نفسي من حاجات كتير قوي اتعلمتها، تجارب دخلت فيها، اختيارات وصلت لها، حاجات بقيت بحبها، وحاجات ما بقيتش بحبها، فهمت نفسي أكتر، اتعرفت على نفسي أكتر، فهمت أنا محتاجة إيه من الجواز، إيه المهم وإيه اللي مش مهم، إيه اللي محتاج مجهود وإيه اللي مش محتاج مجهود، وقعدت فترة كبيرة جداً بدعي ربنا بإنه يعوضني خير ويعوضني خير صبري، لأني كنت في الفترة دي بحاول أقصى حاجة في الدنيا إني أحافظ على نفسي وما أغضبش ربنا".
أسما شريف منير من حفل زفافها
وأكملت رسالتها: "حاولت إني أدعي ربنا كتير قوي إنه يقف جنبي ويختار لي، وكنت دايما بقول: يا رب اختار لي ولا تخيرني، وكنت مركزة جدا في موضوع إني أتعامل بالتوكل، وتوكلت على ربنا تماماً تماماً في القرار ده، وتعاملت على إنه هو اللي هيجوزني وهو اللي هيقول لي أعمل إيه، قلت له: سهل لي الطرق المعينة اللي أنت عايزني أعملها. أنا نيتي خير ومش عايزة أعمل حاجة غلط وعايزة أتجوز وأتستر وأعيش حياة كريمة فيها احترام وفيها تقدير وفيها عوض، وكلمت مع ربنا كتير لحد ما جه وقت صدقت جدا وكان عندي يقين غير عادي إن ربنا هيحقق لي الحاجة دي لأني كنت عديت بفترة تعب كبيرة قوي نفسي علشان أقدر أتخطى ده كان بفكرة إنه صحيت نفسي في الشغل وتوكلت على ربنا ومقررة إنه هو هيختار لي الأصلح".
واستكملت: "وده اللي حصل عمري ما كنت أتخيل إني هتعرف على أحمد إزاي ولا إن إحنا لما تعرفنا على بعض إن إحنا كنا هنتجوز أصلا أو أي حاجة وحتى أنا بيني وبين نفسي، عشان كان عندي يقين، كنت عارفة إني هتجوز، وكنت قايلة إن أنا هتجوز في تاريخ معين يوم 25-5-5، كنت خلاص بقول للناس كلها إن ده يوم فرحي وإن أنا هتجوز اليوم ده، وأصلا ما كانش فيه حد في حياتي خالص".
وتابعت أسما: "من كتر يقيني إن ربنا هيبعت لي حد وإنه هيرزقني بالزوج الصالح اللي يريح قلبي ويعوضني ويحسسني بالأمان وبالاحترام وبالاحتواء واللي شدني في أحمد إنه قريب من ربنا وبيغيرش الحقايق، وعارف مسؤولياته تجاه ربنا وعيلته، وعارف معاملاته تجاه ربنا عاملة إزاي، فلقيت الشخص اللي ممكن يبقى بيعامل الناس وجواه سالك، جواه إيمان ده حد تقدر تثق فيه وتحس إنه تقدر تبني معاه حياة وإنت متطمن أكيد بنتضايق ونزعل من بعض، احنا الاتنين فينا عيوب وكل حاجة زي كل البشر، بس فكرة إن الاختيار نفسه ربنا وفقني فيه وسهلها من عنده، يا رب يبقي خير، لحد ما أموت يبقى هو في حياتي".
يشار أن الفنانة أسما شريف منير تظهر من خلال مقاطع فيديو على منصات التواصل الاجتماعي، وتقدم محتوى للجمهور وحققت نسب مشاهدات كبيرة خلال السنوات الأخيرة.