آمال رمزي: تم الزج باسمي في قضية "الرقيق الأبيض"

أكدت الفنانة آمال رمزي أنها تم الزج باسمها في قضية "آداب" حدثت في فترة السبعينيات وعرفت باسم "الرقيق الأبيض" واتهمت فيها بشكل رئيسي الفنانة ميمي شكيب.
وقالت آمال رمزي في لقائها ببرنامج "نص الكلام" من تقديم راغدة شلهوب عبر قناة "النهار": أحنا فوجئنا بأنهم طلبونا في التحقيق وكانوا بيسألونا عن حاجات منعرفش عنها حاجة، حرام مكنش مظبوط.
وتابعت: مكنش في راجل وكان المحامين بيتكلموا عن أزاي "دعارة بلا ذكر" طيب عملوا مع مين واتكلموا مع مين كله "آنا تقول" القانون مفيش "آنا" ودي الشغالة اللي أتدربت علشان تقول كلام محدد، اعتقد اللي لفق القضية ناس كانت على علاقة بمدام ميمي.
وأكملت: أخدنا براءة لعدم صحة التهمة، كل اللي اتقال علينا مش مظبوط، وطلعنا براءة بعد شهرين ومتحبسناش، وبعدها سافرت إسكندرية هربا من الضغوطات كان بيطلب مني أحضر سهرات.
وخلال اللقاء، كشفت آمال رمزي سبب خلافها وغضبها من الفنان عادل إمام، وقالت: زعلت من عادل إمام كان هيعمل "البيه البواب" وأنا كنت هقوم بدور مراته، هو اعتذر وجاله شغل تاني وأحمد زكي قدم الدور بداله.
وتابعت: أحمد زكي قالي مينفعش تبقي مراتي لأنك حلوة وأنا عاوز زوجة سوداء مش ممكن أسيبك وأروح لصفية العمري أنتوا الاتنين زي بعض، وطلب مني أقدم دور ضيفة شرف وأخد أجري زي ما هو.
وأكملت آمال رمزي: كنت سعيدة بدوري في "البيه البواب" لأن الفيلم نجح جدا.
كما كشفت آمال رمزي عن رأيها في القبلات وارتداء الفنانات للمايوه في الأعمال وقالت: فتحنا عنينا أن أحنا بنحب السينما ودا تمثيل يعني إيه سينما نضيفة ومش نضيفة، والتشدد اللي حاصل دا بسبب ناس إرهابيين موجودين وسطهم، دا مش تدين دي شغله بيكسبوا منها، لكن الحمد لله ربنا نصرنا عليهم.