"أبو الليف" يتخلى عن أيمن بهجت قمر

كشف الشاعر الغنائي أيمن بهجت قمر عن خبر تخليه عن مشروعه الغنائي الذي بدأه مع المطرب أبو الليف في البومه الأول بناء على رغبته.
وقال في تدوينة طويلة على حسابه بموقع "فيس بوك ": "كنا طول الوقت أنا وتوما ومحمد يحيى بنشوف مشروع أبو الليف على أنه مشروع مختلف وكنت حاسس أنه شكل جديد نقدر نقول فيه كتير ونتكلم ف اللي مابنتكلمش فيه مع مطربين تانيين..في البدايه اتهاجمنا هجوم قاسي من اللي ما استوعبوش التجربه وكانوا باصين لها بنظرة سطحية ولكن لقينا رد فعل من عدد كبير من الجمهور فاق التوقعات بدءًا من اختيار اسم نادر مرورًا بالألبومين اللي عملناهمله وكنا بنسعى جاهدين أن أبو الليف مايتصنفش ف دايرة الغنا الشعبي الصرف ومايتحطش ف نفس القوس اللي جواه سعد الصغير وبوسي وأحمد شيبه الخ مع احترامي ليهم بس ده مش مشروعنا ولا ده قدر موهبة أبو الليف ولا دي المزيكا ولا الأفكار اللي تتحط في الإطار الشعبي التقليدي".
"ويمكن الفكر ده ابتدى يتعارض مع طموح أبو الليف في الفتره الأخيره لأنه اتشهر وهو كبير والأغاني اللي بنعملهاله من وجهة نظره ونظر البعض مابتأكلش عيش وهو اكيد معزور عشان كده لما اتأكدنا من جوانا أن أبو الليف عايز يمشي ف طريق تاني هو من حقه يختاره، طريق مش متماشي مع فكرنا قررنا اننا نتمناله التوفيق والنجاح وتركه بكل حب وود وبالتراضي تنفيذًا لرغبته لإستكمال مشروعه الفني اللي هو شايفه وبالطريقه اللي تريحه.. وقررنا احنا كمان البحث عن مشروع غنائي جديد نقدر نكمل معاه اللي ابتديناه".