أحمد السعدني ناعيًا طليقته: "أمل حياتي إللي اتهد"

نعى الفنان أحمد السعدني خلال صفحته الشخصية على موقع التواصل الاجتماعي فيس بوك في الساعات الأولى من صباح اليوم الأحد طليقته وأم أبنائه أمل سليمان التي وافتها المنية الجمعة 9 أغسطس.
وقال "السعدني"، عمري في حياتي ما اتكلمت عن حياتي الشخصية لكن حسيت إني لازم أعمل كده دلوقتي، فذكر إن الذكرى تنفع (المؤمنين) أو الكافرين أو المستهبلين أو تنفع أي حد ححس إني عملت حاجة ححاول مطولش يوم 9/9 /2003 حب من أول نظرة في الشارع ما بين معهد السينما، حيث كانت تدرس معهد فنون مسرحية، حيث كنت راكب عربية وكانت ماشية علي رجلها كنت حخبطها، لكن حصل خير لا محصلش قوي خبطتني هي في قلبي، حب تقطيع شرايين، سنة خطوبة، سنة كتب كتاب، شهر جواز، خلفة أول ولد، هنا بدأت المشكلة اللي بكتب الكلام ده عشانها.
وتابع: "انا زي كتير للأسف شباب anti تحمل مسئولية بص لنسب الطلاق وأنت تفهم انا بيجيلي ارتيكرية لما أحس إني مسئول وهي برضه حبيبتي زي بنات كتير بتقول طلقني أكتر مبتنطق اسمي كانت النتيجة في أول سنة بس حوالى 4 طلاقات شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالي يا عم طبق الشروط ادي أول طلقة".
وأضاف:" قشطة يا باشا عشت حياتك ؟ آه...ارتحت ؟؟ لا.. وحشتني وحشني حنيتها وحبها وهبلها متيجي نرجع يا بت يالا يا متخلف هوووووب جبنا تاني ولد نفس الإحساس نفس الأرتكريه بس المرادي صموووووود مش حينفع نتطلق تاني لا تصدق نفعت الجانب الأناني في شخصيتي غلبني يا عم كبر مخك وعيش حياتك المشكلة إني عمري مارتحت كنت عايز حضنها وحنيتها وهبلها بس كنت بأجل الرجوع يمكن أكبر أو أعقل أو اقدر أتحمل المسئوليهة بجد حددت لنفسي سن معين أرجعلها فيه قال يعني حبقي نضجت بس ملحقتش.. ماتت في لحظة كانت بتكلمني قبلها بساعة ومكنتش عيانة كان عندها ضغط زي أغلب الشعب المصري الحمد لله.. ماتت ومشيت وقررت تسبني للأبد كنت فاكرها حتستناني ومتأكد من ده مستحيل تحب حد غيري مجاش في بالي إنها ممكن تموت دلوقتي صغيرة واكتر واحدة في حياتي شفتها بتحب الحياة وعندها طاقة إيجابية
واختتم السعدني "ماتت وسابتلي الولدين والندم.. أنا متاكد إنك في الجنة رحتي للي خلقك يوم عرفة وأميره وست البنات والستات ونضيفة وكريمة وصيتي ولادي وبيتي.. بحبك يا أمل حياتي اللي اتهد وبوعدك المرادي حشيل المسئولية للأسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من أحن أم ربنا يقدرني وأربيهم أحسن ما كنتي عايزة بحبك ومش بطلب منك غير إنك تسامحيني.. ربنا يرحمك ويرحمني ويرحم ولادنا يا حبيبة عمري الوحيدة".
صدمة كبيرة تلقاها الفنان المصري أحمد السعدني بعد وفاة طليقته وأم أبنائه، أمل سليمان، نتيجة إصابتها بأزمة قلبية مفاجئة.
ونقلت أمل إلى أحد المستشفيات الخاصة بمنطقة الشيخ زايد بالجيزة، بعد تعرضها لأزمة قلبية حادة تسببت في وفاتها.
وتقرر تشييع جثمان الراحلة بعد صلاة ظهر السبت، على أن يتم دفن الجثمان بمقابر العائلة بمدينة السادس من أكتوبر.
الفنان السعدني لديه طفلان من طليقته الراحلة هما ياسين وعبد الله، وشهدت الحياة الزوجية للثنائي العديد من الخلافات، حيث لم تفلح محاولات الأهل في حل الخلافات التي نشبت بينهما ما تسبب في انفصالهما قبل سنوات.