قنبلة الضحك ماري منيب: أول ما شفت جمهور المسرح.. صرخت "يا لهوي يامي"

قالت الفنانة الكوميدية مارى منيب إن بداية مشوارها الفنى كان فى الغناء وليس التمثيل، تحكى مارى قصتها فى لقاء على التليفزيون الكويتى قائلة: «ياخونا بردانين.. يا أهل الشفقة جعانين.. اصحى يا واد يا سلامة.. سبنا خلينا نايمين» دى كانت أول ظهور لى فى عالم الفن.
وأضافت ماري منيب: «كنت كمطربة وليست ممثلة، وابتدت حياتى من على المسرح، وكنت من البنات الخجولة جدًا، ولا أمتلك الجرأة اللى أنا فيها دلوقتى، كان عندى وقتها 14 سنة، وأول ما شفت الجمهور قدامى فى المسرح صرخت وقولت يا لهوى يامى، وقعت ونمت على المسرح، بس قولت بينى وبين نفسى لازم أكمل العرض، ولقيتهم بيكلمونى إهدى عشان دورك فيه غناء، بعدها فضلوا يقولولى اتكلمى قولى حاجة انطقى، وأنا على المسرح مش عايزه أتحرك وأقول أبدًا، وفضلوا يفهمونى إن التمثيل مش كده لو عايزه تبقى ممثلة، وأن دورك بتغنى وفشلت فى أول عرض، ودخلت تانى يوم العرض ووقتها منمتش على المسرح، بس فضلت مغمضة عينى، وكلهم يزعقوا فتحى عنيكى، وفتحت عينى وأول ما أشوف الجمهور أغمض تانى وأصرخ أقول «يامى» لحد ما بدأت أكسر الحاجز دا واتعودت على الجمهور، بس لحد دلوقتى عندى رهبة من الجمهور أول ما أشوفه».