أحمد أمين: قعدت في البيت بسبب قناة النهار

خرج أحمد أمين مقدم برنامج "البلاتوه" عن صمته أخيرًا بعد حوالي عام كامل، حيث فسر سبب توقف تصوير حلقات جديدة من البرنامج وإعادة الحلقات القديمة على مدار الشهور الماضية.
وكتب أمين على حسابه الشخصي علي "الفيسبوك": "برنامج البلاتوه وقف.. والحلقات المعروضة حاليا حلقات معادة.. وداخلين على سنة كاملة تقريبا ماعملناش حلقات جديدة.. توقف البرنامج كان بسبب قرار من قناة النهار لتعرضها لبعض المشاكل المالية والتفاصيل أنا مش عارفها.. للأسف ده ترتب عليه حاجات كتير.. أولا: اعتذرت عن كل الشغل اللي كان ممكن أعمله علشان عايز اتفرغ للبرنامج، وكانت القناة بتوعدنا كتير إننا راجعين لكن كلها كانت وعود وبس والله يعينهم على التحديات اللي هما فيها.. فبقيت قاعد في البيت مكبوت عندي حاجات عايز أقولها ومش عارف.. ولأني متعاقد مع القناة ماليش حق إني اشتغل في قناة تانية".
واستكمل أمين: "القناة بدأت تنزل إعلانات على المحتوى القديم بطريقة مسيئة جدا للمحتوى.. وطبعا أنا اعترضت كذا مرة ومافيش فايدة.. فابتدت توصلني تعليقات سلبية من ناس ليها كل الحق تزعل لأن أنا شخصيا منزعج وبقيت ما بحبش اشوف صفحة البرنامج ولا فيديوهات البلاتوه طبعا مع كل الاحترام للإعلان نفسه وللمعلن؛ لكن إنك تقطع عملا فنيا وتحشر فيه إعلان بالشكل ده.. عيب".
وتابع: "كل يوم ناس كتير بتسألني البلاتوه فين.. وأنا ما كنتش عايز ارد احتراما للقناة اللي كانت سبب في ظهور أول برنامج تليفزيوني ليا.. بس أنا كنت ساكت طول الفترة اللي فاتت علشان فيه ناس من فريق العمل ليهم مستحقات مالية ولسه لغاية النهارده ماخدوش فلوسهم (وانا منهم) فكنت أتمنى إننا نرجع نشتغل لكن يبدو إن مافيش فايدة.. أنا ممكن أتحمل كل المشاكل السابقة إلا إن الناس تبدأ تزعل من محتوى أنا تعبت فيه علشان يسعدهم ويرضيهم".
واختتم كلامه قائلًا: "ادعو لي أعرف أرجع أقدم اللي كنت بحبه زي ما كنت.. وأشكركم على صبركم علينا.. وبعتذر عن كل إساءة أو تأخير ياريت القرار كان في إيدي.. لكن ما باليد حيلة.. وربنا يكتب لنا رزقنا في فرصة حلوة جديدة أعرف أعمل لكم حاجة تسعدكم".