طبيب أقصري: "ماحدش يضحك عليكم بإعلانات التبرع للمستشفيات"

أثار منشور لطبيب أقصري حالة من الجدل بعد أن طالب فيه المواطنين بالتبرع لمستشفيات حكومية وجامعية بدلا من التبرع لمؤسسات ومراكز طبية من نوعية 57357 ومؤسسة مجدي يعقوب وغيرها من المؤسسات التي يتم الإعلان عنها خلال أيام شهر رمضان المبارك.
وقال أحمد أبو القاسم طبيب أقصري في المنشور الخاص به على صفحته بموقع التواصل الاجتماعي فيس بوك "البوست ده ممكن يكون صادم بس اقسم بالله صريح واللي يعرفني كويس يعرف إني مش حاخسر صيامي وأهاجم مؤسسات ناجحة لمجرد لغو الحديث لكن بجد الموضوع بقي أوووفر..ياريت محدش يضحك عليكم بإعلانات التبرع للمستشفيات.. المستشفيات اللي بيجمعولها تبرعات دي والله والله والله مش زي ما انتوا متخيلين ".
وتابع أبو القاسم " مش بيستقبلوا حالات صعبة (لازم تكون الحالة متقشرة ونسبة شفائها أكبر من 70% الحالات الصعبة الميئوس منها بيرموها عالجامعة والمستشفيات الحكومية علشان بيخافوا نسبة الوفيات mortality rate تزيد وبالتالي تأثر على سمعتهم الدعائية على رأسهم 57357.. والعيادات الخارجية نضيفة والتمريض شكلهم حلو والدكاترة شبه نجوم السينما مش علشان حاجة لأ علشان المرتبات هناك مجزية جداااا وعدد الحالات بالمقارنة بالمستشفيات الحكومية قليل جدا".
وتابع أبو القاسم: " أنت كمتبرع المفروض فلوسك اللي هي بتنفقها (مما تحبون ) عاوزها تتصرف بشكل عملي موضوعي وتوصل لمستحقيها مش تتصرف على الدعاية والإعلان والدهانات والخلاصة من كل زمايلنا اللي اشتغلوا في الأماكن دي أولا شغل (معهد القلب ) اللي محلب شردلهم على الفضائيات بالأرقام أفضل مليووون مرة من مستشفى زي مجدي يعقوب بس الفرق أن "أنيسة حسونة " عارفة تعمل markting للمكان وطبعا مش محتاجين نتكلم عن الفرق بين "المعهد القومي للأورام " ومستشفي 57357 ".
واختتم أبو القاسم مؤكدا " طبعا ده مش معناه إني مش عاوز الناس تتبرع بس لو أنت من النوعية اللي بتحب كل جنيه يتصرف لمستحقيه يبقي اللي محتاج تبرعاتك هي المستشفيات الجامعية والحكومية بمنظرها الزبالة اللي أنت بتشوفه بالعيانين اللي ماليين الطرقات بالعجز الرهيب في الأدوية والمستلزمات والقوي البشرية والتمريض اللي مش لاقي حق المواصلات ورغم كده score الحالات بتاعهم اعلي من اعلي مستشفى خاص هما دول اللي محتاجين الدعم والتبرع".
وأعلن عن حسابات لمستشفيات وجمعيات للتبرع ومنها "حساب رقم4662 بنك ناصر الاجتماعي أو جمعية أصدقاء قصر العيني بداخل قصر العيني وحساب رقم 30000 بنك مصر لجمعية إنقاذ مرضى صعيد مصر وحساب رقم 99999 البنك الأهلي فرع جامعة أسيوط _جمعية أصدقاء مرضي سرطان صعيد مصر مختتما "دي حسابات أماكن للتبرع موثوق فيها وممكن قبل ما تحط جنيه واحد ،تروح وتشوف وتتأكد بنفسك".