ثلاثية تاء المربوطة.. شعر أماني سعيد محفوظ

"نون النسوة"
أنا أصل الدنيا
روح.. نفس.. كيان
مش عورة ف صورة
ولا جسم يُهان
أنا نص الدنيا
ستات وبنات
مش كسر مؤنث
ولا جمع فُتات
أنا مش ولا حاجة
علشان تمحيني
ولا كائن شائن
ف كهوف تخفيني
أنا فخر وإسوة
أنا كُترة وعزوة
صوت حُر وكامل
أنا نون النسوة..
*****
"حرمة"
أنا حُرة.
وحُريِتي دي فرض عليك..
أنا غُرة ف جبين وطنك
ومش زينة جابوها إليك.
أنا فاعل ومش مفعول به لأجلك..
ولو يوم تنتِقص مني ده من جهلك.
أنا بنتك.. أنا حبيبتك
أنا أختك .. أنا أمك
أنا الحُضن اللي أخر الليل يجي يضمك..
أنا حوا يا بني آدم
أنا حُرمة
*****
"لوتس تتمخض بالروعةِ من قلب الطين"
أنا ست..
إتحديت نفسي قبل كل شئ
وأي شئ..
إتحديت فكر أبوية وأخوية وجوزي وولدي
إتحديت مجتمعي ووضعي ببلدي..
إتحديت الرجال والأهوال والأقوال
والأفعال..
إتحديت الأحزان
والأوزان التقيلة
ونعتي بالرذيلة..
إتحديت المجتمع
واللي استمع لصوت ينادي:
أُخنقوا النساء..
فهُن الداء
وفوق المضاجع هن الدواء..
إتحديت الصُحاب
العابرين والماكرين والخائنين المتنمرين
المتهكمين السائلين:
إنتي مين؟
اتحديت الأمية والجهل الرنان
وطقوس الختان
وصمم الودان..
اتحديت الوأد والعهد القديم
والفكر العقيم..
إتحدّيت الإغتصابَ
سراً وجهراً
ومراسم الدفن ف جوازة
لعيلة
بالجهل ربطوها بكهلٍ جَيبُهُ عظيمٌ فَخِيم..
اتحديت جرايم الشرف
والقرف
والعفن الكابس على أنفاس العقول
والروث المنقول
من جيل إلى جيل
ضد المرأة
أمام المرأة
خلف المرأة
وحول عهود نمو المرأة..
واديني انا اهو..
تلك المرأة
وهذي المرأة
وعلى مسمعٍ ومرآى سأبقى..
سأحيا
سأنجو
سأحلُم
وأتحدى
وأقع لأقف..
ومش ف السر حتمنى وصول بكرة
أسيّب فيه خطوط شعري بلا مشبك ولا دبابيس
وأركب موج ف جوفي حبيس
واشد قلوعي وأتحرر
وحتحرر