غسل السياسة بفنيك صوفي

موجة ارتفاعات متوقعه خلال الأيام القليلة المقبلة في أسعار الصابون والفنيك وبعض المنظفات .. السبب ، إعلان الطريقة التسقيانية على لسان كبيرهم الشيخ "أحمد التسقياني" عزمها على تطهير السياسة .. وغسلها من الدنس والعفانة والعتة .. إيه الكلام الكبير ده .. تطهير وغسيل وعته .. طب إزاي .. بالصابون ولاّ بالديتول ولاّ بالشامبو .. الشيخ أحمد يرد : لأ .. بالتوعية .. بالكلام .. بحوار خد وهات من خلال مؤتمرات وندوات وجلسات وقاعدات في الشمس والذي منه .. قال الكبير كمان : " ما عدش ينفع نسيبلهم الساحة كده فايضة .. إحنا هنا .. بلا إخوان بلا سلفيين بلا فنيك .. هنزل الساحة وهنغسل المخاخ البايظة ونعالج الفكر العيان .. ثم حط الكبير نقطة فوق الحرف في بيان شامل وواضح وصريح لا ينقصة الا شوية ملح علي وقية شطة وقال فضيلته : " الصوفية بدأت تنشط .. تسخن .. تولع .. تنتشر .. تنتعش في اليومين اللي فاتوا تعويضًا لفشل بعض الحركات الإسلامية .. هم لا يمتون للإسلام بصلة .. مش مسلمين ابدا .. إحنا الاصل وهُمّا الصورة الضاربة .. جذورنا عريقة .. أصيلة ميه ميه مش تايواني .. وهما نبت شيطاني .. سوابق .. أئمة فتن .. أصحاب مصالح .. مرتزقة .. شعارنا المرحلة الجايه: "التطهير وكنس العفاشة والدعوة لإصلاح ما أفدسته الجماعة اللئيمة" .. وهدفنا : " بلدنا مصر الغالية " .. وطموحنا : " ساحة رايقة بدون شغب بدون أفكار هدامة متخلبطة وسياسة بيضا بتبرق انضف من البوكسارات البيضا بعد غسيلها " .. وع البركة بسم الله نبدأ الغسيل .. وايدكو معانا بالفنيك والديتول .