من ديوان الثورة

إلي شهداء الثورة المصرية في 25 يناير 2011 قالوا يا مصر فدائك
شعر: ماجد يوسف
شهداء التحرير
.. كانوا روح التغيير
.. والسادة المغاوير..للثورة المصرية
.. كانوا طليعة الأمة
.. اللي ازاحوا الغمة
.. واللي احتلوا القمة .. بالروح الفدائية
.. كانوا المثل الأعلي
.. لشبابنا اللي تجلي
..وبعزمه اللي تحلي .. بإيمان وبتضحية
قالوا يا مصر فدائك
.. من غاصب لبهائك
من حاكم لو داقك .. بيزيد في الوحشية
قالوا السلطة مداولة
.. مش شخص.. انما دولة
ومصر عزيزة الأولي .. بنسيم الحرية
حطوا الروح في كفوفهم
واتغلبوا علي خوفهم
خلوا الشعب يشوفهم.. شهداء للوطنية
طلعت كل جموعه
.. لما رجع مرجوعه
.. إلي شكله وموضوعه.. وكرامته المنسية
مش علشان اللقمة
زي ما قالوا اللؤما
لما حلف بالنعمة.. علي أرضه المسبية
لبدمه يحررها
.. من باطش أهدرها
.. ويفجر ثوارها من ملايينها الحية
ليزين شوارعها
عمايرها ومشاريعها
بشباب هما ربيعها.. وفرحتها القومية
وحيفرض إرادتها
وتعود من ردتها
إلي ريحة وردتها .. وح تخرج م الخية
تملا الكون بحضورها
وتبادر إلي دورها
والخير يدخل دورها.. بعدالة وسواسية
نتقدم بوطننا
مصانعنا وأقطاننا
ونلضم ف خيطاننا.. بالقدوة الشعبية
وحنختار نوابنا
.. م الحاسس بعذابنا
والواعي بمطلبنا وبالخدمة العمومية
ونحرر إعلامنا
بشاشاتنا وأقلامنا
كل العالم لامنا ..ع الصورة الهزلية
والمسئول نختاره
بأمانة مشواره
ووجاهة أفكاره وبروحه الثورية
ونغير.. ونبدل
.. ونضبط.. ونعدل
والزند اللي يخدل.. فيه عقول مستنية
ونبطل بقي رشوة
انشالله تكون عشوة
شيلوا خلاص الغشوة.. وارجعوا للروح دية
روح الشهداء الطاهرة
علشان مصر الحرة
طلعت فيها مظاهرة.. لجل ديمقراطية
احفظوا دم شهيدنا
وقابلونا ف مواعيدنا
الحرية ف ايدنا .. والدم ماهوش مية
روح الشهدا ترفرف
علي مصر اللي بتنضف
علي مستقبل أشرف .. للأجيال الجاية