هو يعني إيه سوتيه؟ (بالصعيدي الجواني) .. هاني منسي

(بالصعيدي الجواني)
هاني منسي
قال لى تاكل بس مسلوق
لاجلن تخف، عشان تروق
عاوز تعيش
تبعد عن المسبك والمحمر
والخبز بارد مش متقمر
ويكون أسمر بالردة
تتبع قوانيني بشدة
بلاش المقلي بسمن ولا زيت
زيت زيتون بس لو حبيت
والخضار سوتيه…
فاهم .. يا بيه؟!
….
سيبني اكمل، متقاطعنيش
عشان تعيش؟
ممنوع الحلو والمسَكَر
ممنوع التدخين والمنكر
لا لحم سمين ولا أحمر
تبعد عن الضغط والتوتر
والعشا ثمرة تفاح
بلاش خالص أملاح
تريح نفسك خالص، يا ريت
…..
ضحكت، وفي سري رديت
ه‍أ
كل اللى أنت مسميه قوانين
ده بالنسبة لي شيء روتين
أنا من ساعة ع الدنيا وعيت
عادى إن يوم عييت
بس لا قلت اه ولا شكيت
مفتكرش رحت مستشفى
ولا زرت قبل كده دكتور
ولا وقفت مستني دور
ولا اخدت من عرقي إجازة
لا عرفت في شريط البرشام كام حباية
ولا يعني إيه دوا في قزازة
لو شرف يوم دور زكام
ليمونة بجرشها والسلام
صاحبت الجبنة القريش وصاحبتني
ودود الجبنة القديمة والمش عارفني
وإن كان قصدك بالخبز …العيش
لقمتي باردة م المشنة
طْرْفْ جبنه م الشندة
والمية م القلة قصب
والحلو عنقود عنب
أو دورة بلح رطب
أو هزة فرع م النبقاية
وبلضم م الضلمة ضحكاية
وبفتل أوجاعي ف سهراية
حبل بطوووووول سنين العمر
اربط به ألمي جوايا
وبعجن م الهموم فجر
شمسه زادي و دوايا
فطاري.. وغدايا عشايا
لاجلن ما اعيش حر
نفسي اسيب صورة تشبهني
أهل ال 100 وش كارهيني
أهل اللى فى الوش دول مني
وبعيش وعايش ع الضحكة
ومتعايش مع نفسي
لسه بعرف العب وقت اللعب
لسه بقدر أعرق ساعة الجد
وبعيش
انت بس في ايه بتحكي؟
دالمنكر بالنسبة لي بيبسي
كباية الشاي أصيلة بتكفي
السيجارة بشربها تفاريح
حاسس أن كلامك تجريح
والشغل بالمقسوم
ومستقبلي هو دلوقتي
لا مجموع ولا محسوم
لا مطروح ولا مهموم
وعشايا بكمله نوم
وبعيش
لسه عاشق جلاليبي
غيطاني اللى سايعاني
رجليا اللى شايلني
وضل شجرة توت
والنخلة اللى ع راس الغيط
والشقوق اللى ماليه الحيط
مبتخوفنيش
وبعيش
بكره الهجر عشان القوت… موت..موت
…موت بدري قبل الأوان
أنا نفسي أموت في أواني
نفسي أموت رباني
وأرضي حاضناني
وزرعي لساه رويان
يقولوا عاش طول عمره شقيان
لكن مات إنسان
بلاها أنت وقوانينك
ملعون أبو اليجيلك
وهعيش وهموت بطرقتي
سيبني أروح بس دلوقتي
سيبني أروح مطرح ما جيت
سيبني أروح ف أي حته
سيبني ارجع خلاص خفيت
وانا اللي جايلك مستنظر
أجيب علاجي م البندر
!! قال ايه، عشان اخف
يا خسارة حبر الروشته!!
يا خسارة تمن الكشف
بس ممكن سؤال يا دكتور
هو يعني ايه سوتيه؟