«مزيكا».. مغنواتي والمهنة سواق ميكروباص

انطلق الميكروباص من السيدة عائشة إلي المقطم، وأثناء لم الأجرة سمع الركاب صوتا يشبه عبدالحليم حافظ يغني »يا خلي القلب»‬ ولكن بدون موسيقي، السيدة التي تجلس في مؤخرة السيارة طلبت من السائق أن يرفع صوت الراديو وهي تترحم علي أيام الزمن الجميل وأغانيه الحلوة الرايقة، لم تكن السيدة تعلم أن من يغني في أذنها هو السائق نفسه.
اسمه سيد، ومشهور بين زملائه السائقين ب»‬مزيكا»، يغني للركاب في الميكروباص لعبدالحليم ومحمد عبدالوهاب وفريد الأطرش وعبده الإسكندراني وحسن الأسمر، كلما سمعه أحد يثني علي صوته ويقول له: »‬خسارتك في الميكروباصات يااسطي».
اسمك ايه؟
سيد محمد حسين
ومزيكا ده جالك منين؟
أصحابي أطلقوه عليا لما عرفوا إني بغني، واحنا في القعدة كانت شغالة مسرحية »‬المتزوجون» ولما ظهر نجاح الموجي قالولي: إنت مزيكا.
بتغني من إمتي ؟
بقالي أكثر من 30 سنة
أومال إنت سنك كام ؟
أنا مواليد 1972 يعني عندي 47 سنة تقريبا.
دخلت مدرسة؟
معايا دبلوم صنايع.
امتي اكتشفت إن صوتك حلو؟
من وانا عندي 15 سنة تقريبا
كنت بتغني في حفلات المدرسة؟
لأ
امتي أول مرة قررت تغني قدام ناس ماتعرفهاش؟
من حوالي 7 سنين .. لما بدأت أشتغل سواق ميكروباص.
وكنت بتشتغل إيه قبل الميكروباص؟
سواق برضه بس في شركات خاصة أو دور أيتام.
شهرتك كسواق ولا كمغني؟
السواق اللي بيغني.. ممكن ألاقي أطفال ماشيين مع والدتهم ويشاوروا عليا ويقولوا الفنان أهو اللي كان بيغني وصوته حلو وتعليقات كتير شبه دي.
بتغني إزاي في الميكروباص؟
أول مرة كنت بدندن بصوت واطي.. والمعروف إن أي مغني بيدندن بيكون صوته أحلي بكثير من الصوت العالي مابتكونش القرارات والجوابات ظاهرة أوي.. لاقيت واحدة من الركاب بتقولي ماتعلي صوتك شوية ياأسطي.
وإنت منين عرفت القرارات والجوابات.. درست موسيقي؟
لا. بس أعرف إن الغنا فيه قرارات وجوابات وعُرب ومقامات.. أعرفهم كمانشيتات بس.
يعني إنت بدأت الغنا مع الركاب في الميكروباص؟
بالظبط.. في كل دور بيسمعني 14 راكب، في المرة التانية ممكن تصادف إن واحد منهم يركب مع 13 راكب مختلفين وأول ما يشوفني يقولي يافنان مش هتسمعنا حاجة، وفي بعض الركاب كانوا بيطلبوا مني أقفل الكاسيت وأغني بداله.
كل الناس كانت بتتقبلك؟
كان في ناس بتضايق قبل ماتسمعني وبعد كدة بطربهم وبيتبسطوا.. وبعض الشباب المراهقين بتريقوا علي الشخص اللي بيقولي غني، وبيعتبروني الحاجة اللي هيتسلوا عليها وبس، بمجرد ما أدندن بلاقيهم يسكتوا خالص وفي منهم بيعتذرلي وهو نازل.
السخرية بتضايقك؟
بحبها
ليه؟
لأنها اختبار صعب بالنسبة لي، جميل إنك تعجب مجموعة ركاب كل واحد فيهم ذوقه مختلف عن التاني والكثير منهم مابيكونوش متوقعين انهم يسمعوا من سواق ميكروباص صوت حلو.
بتحب تسمع لمين وتغنيله؟
عبد الحليم حافظ ومحمد قنديل وكل المطربين القدام.
ومن المطربين الشباب الجدد؟
الجديد بالنسبة لي هو عمرو دياب أو محمد فؤاد وأنغام وصابر الرباعي
والمهرجانات؟
معرفش اللي بيغنوا مهرجانات ومش بسمعهم، وبضحك علي زمايلي اللي بيسمعوهم وبقولهم طب إنتوا فهمتوا إيه بقي في الآخر من الكلام ده؟!
بتعمل قعدات مع زمايلك في الموقف ويسمعوك وانت بتغني؟
كتير جدا بنعمل كده
شاركت في احتفالات وطنية وانت في الجيش؟
في فترة مركز تدريب السواقين بالجبل الأحمر وأثناء زيارة أحد القادة سألوا كل المجندين عن أي شخص يعرف يغني أو يعزف ، فقولتلهم إني بغني وغنيت وقتها أغنية وطني حبيبي اللي كان مشارك فيها عبد الحليم حافظ.
والسواقين زملائك؟
بيعشقوني.. وغالبا بتكون قعداتنا واحنا مستنيين دورنا علشان نطلع وبغنيلهم في الوقت ده.
وإيه أحلامك؟
نفسي الناس تسمع صوتي، وأدخل قلوبهم
مافكرتش تسوق لنفسك علي السوشيال ميديا؟
ماليش فيها خالص.. كتير من أصحابي بيصوروني وينزلوا الفيديوهات علي النت بس أنا معنديش خلق للسوشيال ميديا ولا متابعتها خالص، وحتي مابفكرش أدخل علي صفحاتهم وأشوف اللي هم نزلوه.
صوتك استفاد من الميكروباص ؟
خلاني أكتشف رنات وعرب في صوتي ماكونتش أعرفها ولا كنت بنميها، وعرفتها لما ارتبطت بالراديو وأنا سايق العربية فالسواق مننا بيكون صديق التسجيل، هو اللي بيسليه.