كلام علي الورق

غضب الفيسبوك

تعليقات شباب الفيس بوك انفجرت كالبركان تنتقد قرار الحكومة الجديدة بزيادة أسعار الكهرباء وهي تعليقات لا تحتاج الي تعليق .. « زيادة أسعار تاني هيا ناقصة.. ياتري فين فلوس الصناديق الخاصة!! وياتري فين صندوق 36 - 6!! فين فلوس تبرعات الدول العربية!! ياتري فين الضرائب التصاعدية!! فين الحد الأقصي!! فين فلوس حسين سالم!! ولا فين فلوس مبارك والحاشية بتوع الوطني! وياتري فين فلوس منجم السكري.. ولا فين فلوس قناة السويس.
ولا ياتري فين فلوس الإخوان التي أعلنوها جماعة إرهابية!!! فين فلوس سياسة الترشيد والتقشف بعد إلغاء المياة المعدنية في اجتماعات الوزراء.. وفين تبرعات رجال الأعمال والإعلاميين والراقصات ولاعبي الكوره وفين وفين وفين ؟؟؟! ارحمونا بقي!! «
أنا عاوز أسأل السادة المسئولين: الكهربا بتقطع ليه واحنا في الشتا.. أنا عاوز أعرف هتعملوا إيه في الصيف.. الموضوع خطير ولازم تجدوا له حل.. هل الحكومة تعاملت مع سرقة الكهربا بشكل فعال هل حصرت الحكومة المباني اللي اتبنت بعد الثورة وتعاملت معها بنظام الغرامات التي توفر للدولة أموالا لبناء محطات كهرباء جديدة؟ الغريب أن الحكومة تيجي في الساهل علي إنسان غلبان وتطلب منه دفع الزيادة في فاتورة الكهربا مع أن أسعار الكهرباء لسه مرفوعة في الصيف الماضي ترتفع تاني ليييييه؟! «
متروحوا تتشطروا علي اللي بيسرق الكهرباء من أعمدة النور في الميادين والشوارع.. والأظرف البياعين اللي بيسرقوا الكهربا من شركة الكهرباء بشارع 26 يوليو عيني عينك في عز الضهر!! متروحوا تتشطروا علي المسئولين عن إنارة الشوارع بالنهار فوق الكباري والشوارع .. ولا روحوا اتشطروا علي المباني الحكومية اللي منورة ليل نهار إضاءة و تكييف عمال علي بطال!!»
«حسبي الله و نعم الوكيل في كل مسئول شايف كل مظاهر الفساد دي وضياع فلوس الدولة وفي الآخر ييجي علي الغلبان .. ملحوظة: الحكومة بتقول الزيادة مش هاتمس الغلابة مع أن أي موطن عادي عنده تكييف واحد استهلاكه بيعدي ال 650 كيلووات شهريا .. فعلا الكدب خيبة يا حكومة !!»