فيس بوك: كلاكيت تانى مرة: رُفعت الثورة!

شيرين فرغلي
"ثم مات المخرج والمنتج، وعندما عرض هذا المسلسل في التليفزيون، مات المشاهدون جميعا".. تلك العبارة الساخرة هي الأقرب إلى حكم براءة جميع المتهمين في "موقعة الجمل"..
جاء الحكم لكي يكمل ما سبقه من حلقات "مسلسل" البراءة للجميع، والنتيجة إصابة الجماهير المصرية ب"الحسرة والإحباط"، بسبب "كلمة النهاية" المؤلمة التي يرفضها الجميع: "رُفعت الثورة".
إلى الميدان
فيقول رامي محمد، 23 سنة، طالب في كلية الطب: "أنا كنت ليل ونهار في المستشفى الميداني في ميدان التحرير في أول أيام الثورة، وكنت موجود يوم موقعة الجمل في الميدان وشفت شباب زي الورد بيموتوا قدامي، ومش قادر أنسى شكلهم لغاية دلوقتي، أنا مش هقف في صف المتفرجين على ضياع حق الشهداء بعد صدور مثل هذا الحكم الظالم، لذلك لابد من النزول مرة أخرى للميدان للمطالبة بالقصاص العادل".
ويتفق معه حسام الميرغني، طالب في كلية تجارة: "ماينفعش يتقال علينا رجالة لو سكتنا المرة ديه، يعني إحنا صبرنا على حاجات كتير أوي من الأول، لكن كله الإ دم شهدئنا ، لذلك لن نهدأ قبل أن يتم محاسبه كل قاضى تحقيق أو وكيل نيابه أو النائب العام عن فشلهم فى اثبات الإدانه بقضايا قتل المتظاهرين وإحالتهم إلى أعمال إدارية أو عزلهم، وذلك يعتبر أقل شيء ممكن ان نفعلة للحفاظ على حق الشهداء".
بينما يروي رأفت سعد،25 سنة، موظف: "الساكت عن الحق شيطان أخرس، أنا من ساعة ماسمعت الحكم ده وأنا عندي أحساس أني إحنا السبب في ضياع حق الشهداء، علشان سكتنا على حاجات كتير اوي مكنش ينفع السكوت عليها، لكن من النهاردة إحنا مستحيل هنسكت، وهننزل الميدان من أول وجديد ونجيب حق اللي ماتوا عشان إحنا نعيش حتى لو كان الثمن حياتنا".
"حد عايز براءة وما أخدش"
لم تختلف ردود الأفعال حول ذات المعنى على مواقع التواصل الإجتماعي فيس بوك وتويتر:
الرئيس أفرج عن كل الثوار المتهمين امبارح.. النهارده المحكمة أفرجت عن كل المجرمين المتهمين.
وعلى رأي المثل: إن سرقت اسرق جمل.. وإن قتلت اركب جمل.
الله يخرب بيت الفوتوشوب 2011 و 2012 اللى خلانا افتكرنا اننا عندنا ثورة
براءه جميع متهمى موقعه الجمل... عادي شئ متوقع يعني ... هي جت عليهم ... تكملة لمهرجان البراءة للجميع..
براءة كل المتورطين من أعضاء الحزب الوطني المنحل في موقعة الجمل! يبدو إن الجمل عملها وشرخ!
زمان فتحي سرور ومرتضي بيغنوا راجع لفوطي وبشكيري.. حسبي الله ونعم والوكيل.
في مصر: المتهم برئ مهما ثبتت إدانته.
أبو العينين: "ولا واحد مات في موقعة الجمل".. عندما تقف كل ألفاظ الشتيمة التي أعرفها عاجزة عن وصف هذا الشئ.
هاااااار اسود ومنيل.. عائشة عبد الهادي بتقول ازاي حد يصدق إنها بتاريخها ونضالها العمالي وموقفها من قضايا الوطن تعمل كده
في حد عايز براءة تاني وما أخدش؟
نعلن عن وظائف خالية بحزب "البراءة" لمؤسسيه فتحي سرور وصفوت الشريف، يمكنكم ملأ استمارات التقديم بمقر الحزب على النيل (الوطني سابقا)
إحنا لازم نحكم بالاعدام ع الشهدا ......لان مفيش حد قتلهم .. ..... وبعدين احنا هنسيب الجمل اللى عملنا المشاكل ده ....ونمسك ف شوية متهمين خدوا براءه .... مش هنطل احنا لازم ندور ع الجمل ونعدمه
دولة مرتضى منصور قادمة.. اديها طعون..
يا مستنى مصر تبقى ديموقراطيه يا مستنى البيبسى ينزل من الحنفية
هما مش فالحين بس غير يقلك نلعب ماتش السوبر عشان هيبه الدوله ونرجع الدوري عشان هيبه الدوله.. لكن شهداء وكلام من ده ياراجل كبر مخك..
قديما عرفنا "الجمل" بأنه : سفينة الصحراء.. واليوم نعيد تعريفه فيصبح: فضيحة القضاء.
هل هي مصادفة أن يحصل متهمي موقعة الجمل على البراءة بعد أيام من عرض فيلم بعد الموقعة