التيار الشعبى لمنصور :"شوف لك حد تاني تلعب معاه لعبة "السى ديهات" وبلاش أنت بالذات تتكلم لا عن الثورة ولا عن الفلول"

هاجم حسام مؤنس، المتحدث الرسمي، باسم التيار الشعبي، مرتضى منصور، بعد تصريحاته إعلامية له، شكك فيها في الذمم المالية لقيادات التيار، وموقفه من نظام مبارك، قائلا "بلاش حضرتك بالذات تتكلم لا عن الثورة إللي معروف إن ملكش علاقة بيها، ولا عن الفلول إللي معروف كويس علاقتك بيهم".
وقال مؤنس على صفحته الرسمية على "الفيسبوك": "السيد مرتضى منصور.. للأسف لم يمكنني وقتي من الرد عليك على الهواء مباشرة أثناء لقائك مع الاعلامي عمرو الليثي.. للأسف يا سيد مرتضى حضرتك اخترت الناس الخطأ إللي تفكر تمارس معاهم معارك طواحين الهواء بتاعتك، آخر حاجة ممكن تشكك فيها معانا إحنا بالذات هو انتمائنا للثورة وموقفنا من بقايا نظام مبارك، وآخر حاجة ممكن تفكر تمسها معانا هي ذممنا المالية".
وأضاف مؤنس: "الكلام إللي حضرتك قلته على الهوا مجرد زوبعة لا معنى ولا قيمة لها، وهنرد عليها بالمستندات والتفاصيل، إللي هي أصلا معلنة قبل كده من بعد الانتخابات إللي فاتت، كان لنا شرف إن مرشحنا حمدين صباحى هو أول وربما الوحيد الذى قدم كشف ذمته المالية علنا، وهو الوحيد الذى قدم بلاغا ضد نفسه في جهاز الكسب غير المشروع ردا على ترهات كثيرة مثل ما تثيره حضرتك وأثبت تحقيقات الجهاز أن ذمته فوق مستوى الشبهات.. وكنا الحملة الوحيدة التي نشرت علنا بعد انتهاء الانتخابات تقرير تفصيلي عن كل مليم وصلها وكل مليم انفقته"..
واستطرد: "مفيش على رأسنا بطحة يا سيد مرتضى.. فشوف لك حد تاني تلعب معاه لعبة "السى ديهات والمستندات والضجيج الفارغ ده.. وبلاش حضرتك بالذات تتكلم لا عن الثورة إللي معروف إن ملكش علاقة بها، ولا عن الفلول إللي معروف كويس علاقتك بهم الله يكرمك.. اصل كل حاجة معروفة وواضحة .. أما بقى حكاية أنك عايزنا نرد.. حاضر يا سيدى هنرد .. بس وقت ما نحب ووقت ما نختار، وبالطريقة التي تناسبنا احنا مش تناسبك أنت.. وبمستندات بجد مش بشغل الهيصة".
وأنهى مؤنس رسالته إلى منصور قائلا: "بالمناسبة يا سيد مرتضى.. حظى أنى من ميت غمر، وجدى الذى افخر به وبانتسابي له فتحي المغربي - أكيد تعرفه كويس - من "أتميدة" إللي كنت بتنزل فيها انتخابات مجلس الشعب.. فبكرر لك تاني والله: كل حاجة واضحة ومعروفة.. فبلاش إحنا الله يكرمك.. خلى العابك دي مع ناس غيرنا.. لأننا مش فاضيين لها، ولا تليق بنا".