قراءة فى المؤتمر الصحفي لعماد عبد العزيز بعد كشف المستور

المؤتمر الصحفي الذى عقده اللواء مستشار عماد عبد العزيز، رئيس اللجنة المعينة التى تدير نادى الزمالك ، كشف خلاله ان هناك من يحاول زعزعة استقرار القلعة البيضاء، من خلال ترويج الشائعات بهدف التقليل من حجم الجهد الذى تبذله اللجنة المؤقتة ومن خلفها وزارة الشباب والرياضة برئاسة الدكتور اشرف صبحي، لدرجة الترويج لهاشتاج اللجنة والوزارة دمرو الزمالك فى ظل تخوفهم من إستمرار اللجنة لفترة طويلة فى حالة نجاحها . عبد العزيز، كان واضحا فى حديثه بالتأكيد على انه كواحد من رجال القوات المسلحة والذى تقلد اعلي المناصب لايطمع في البقاء على مقعد مجلس إدارة الزمالك، بل إنه يرفض لقب رئيس الزمالك مؤكدا إنه يرى نفسه رئيس اللجنة المعينة التى تدير نادى الزمالك. وقال اللواء مستشار عماد عبد العزيز، إنه كواحد من ابناء القوات المسلحة، لايعرف الإنتخابات والالعيبها ولا يفكر فى خوضها حاله اعضاء اللجنة المعينة التى تضم المستشار هشام إبراهيم والمستشار عماد صبحي. وقال إنه يتعامل مع الزمالك كواحد من جماهيره واحد اعضاؤه على مدار 25 عام لذلك هو مهموم بمشاكله ومندهش كيف لنادي بقيمة الزمالك، لا يمتلك فروع واكاديميات مثل باقي الاندية ضاربا أمثلة بالصيد ووادي دجلة والجزيرة واخيرا الاهلي .

وجاءت كلمات رئيس اللجنة المعينة التى تدير نادى الزمالك، لتعري مجالس سابقة وان كان لم يتحدث عن الاسماء لكنه اشار الى ان المجالس التى تعاقبت على إدارة نادي الزمالك، من 2004 ، لم تهتم ببناء فرع نادي الزمالك فى 6 أكتوير بل ان ارض النادي كانت مهددة بالسحب من جانب هيئة المجتمعات العمرانية، فى ظل التكاسل فى عدم اى إتخاذ خطوات للبناء عليها .وقال اللواء مستشار عماد عبد العزيز، إنه كمسؤول عن الزمالك فى هذه الفترة الانتقالية نجح في التوصل إلى اتفاق وتعاقد موقع من وزارة الإنتاج الحربي، على انشاء نادى وستاد في 6 أكتوير، لتحقيق حلمه كواحد من الجماهير ان يكون للزمالك ستاد خاص به والذى لن يتكلف حوالي 2 مليار جنيه بدون ان تتكبد خزينة الزمالك المثقلة بالديون اية اعباء مالية بل انه ينتظر ان يتحقق عوائد مالية من وراء هذه الإنشاءات.

وقال عبد العزيز، إنه عندما ابرم الإتفاق مع وزارة الإنتاج الحربي، يعلم انه لن يجني ثمار هذا الاتفاق لان الإنشاءات تتطلب وقت لايقل عن اربع سنوات اى انه لن يكون متواجد وقتها على رأس ادارة الزمالك لكنه لم يفكر فى ذلك لإنه ليس مهموم بوضع إسمه على لوحة الافتتاح قائلا لا ابحث عن وضعي اسمي على الرخامة لانه يعلم ان التاريخ سوف ينصفه وهذا هو الاهم بالنسبة له .رئيس اللجنة المعينة، قال ان مدة ادارة الزمالك هي 75 يوم حيث قدم كشف حساب عما تم تقديمه في عهد اللجنة.

المعينة التى تدير نادى الزمالك .

عماد عبد العزيز لسنا في خصومة مع احد ولا محسوبين على حد
رئيس اللجنة المعينة التى تدير نادى الزمالك اكد على ان اللجنة لهما مهمة محددة ولسنا في خصومة مع أحد .. محدش كان يعرف الوضع المالي والاداري ايه بس احنا بنتكلم وفقا لورق رسمي .. زي ما بنقدر الاخر ونحترم الاخر لازم الاخر يحترمنا ويقدرنا .. اللي بيكتب من برة مش عارف النادي فيه ايه ياريت تيجي تدير النادي كدة وتحط حلول لما نحن فيه .. اتعلمنا في القوات المسلحة احترام الاخر والصغير قبل الكبير ..
وقال استلمنا الزمالك 27 ديسمبر الماضي يعني بقالنا شهرين ونص هل هنصلح مورثات داخل النادي كل الاحترام للي فات واللي هيجي هم مجالس منتخبة ولكن ما المطلوب مننا في 75 يوم وجينا في فترة القيد الشتوي وتفاصيل كتير جدا كنت اتمنى وجود مندوب من الجماهير يجي يشوف كنا بنعمل ايه عشان النادي .. كان مطلوب مننا نجيب لعيبة .. الزمالك وكانه النادي الوحيد في جمهورية مصر العربية يجي له 11 عرض بأرقام خيالية هو انتوا عايزين ايه من الفريق احنا جايين على استقرار وانا جايلي عروض للفريق كله ولما اقوله لأ شوفوا تأثير ده على اللاعب ايه .. ليه مركزين مع الزمالك يا جماعة .. عقود اربع لاعيبة انتهت جنش وشيكا وفتوح واوباما
والناس كلها طبعا بتصرخ دول هيمشوا وعشان النوايا حسنة ورغم ان مفيش فلوس قدرنا نجدد .. انا مش تبع حد ومليش علاقة بحد انا تبع نفسي ومشجع للنادي وعضو به ..
واكد عماد عبد العزيز، النادي منقسم جبهات بدون تسمية ياريت نشتغل لصالح الزمالك مرة .. احنا مكلفين من الدولة ومش بنفذ اجندات واحنا على قدر المسئولية
من يوم 7 ديسمبر اول لجنة المستحق على فريق الكرة 152 مليون جنيه وقدرنا نوفر رغم ان مفيش ولا متبرع اقسم بالله بجنيه وواحد جه يتبرع ب5 مليون جنيه رفضنا ووجهنا له خطاب شكر الزمالك غني ورجع يتبرع ب400 الف جنيه رفضنا برضو .. انا لا اهوى مناصب ولا عايز شهرة بس طالع اجبار عشان تعبنا من اللي بيتقال
نفسي اي مجلس ادارة يمشي بعد اداء مهمته نعمل له حفل شكر مش نقطع فيه ..
عماد عبد العزيز : رئاسة الزمالك شرف بس انا مش رئيس النادي
رئاسة الزمالك شرف ولكني لست رئيسا له ولكني رئيسا للجنة مكلفة بإدارة النادي لا نعرف في القوات المسلحة انتخابات ولا هي لعبتنا ولا اتطلع لاي منصب داخل النادي توليت كافة المناصب التي تمنيتها في القوات المسلحة ..
بفضل الله قدرنا في 75 يوم وبمساعدة اللجنة التنفيذية والمستشار المالي طارق حشيش .. ارض اكتوبر من 2004 اتسحبت كام مرة في حين ان اندية تانية عندها 5 و 6 فروع اللي اعرفه ان لما حد يدخل انتخابات يبقى عايز يضيف ولكن ما هي الاضافة اللي حصلت من 2004 لا شئ ولا اسقط على احد لا اعلم من كان في النادي خلال هذه الفترة وعملنا الاتي :
1 - فرع اكتوبر بعد ما تم سحبها اكثر من مرة لعدم الجدية في التنفيذ تم توقيع بروتوكول تعاون مع وزارة الإنتاج الحربي للمشروعات الهندسية انا استملت 27 ديسمبر وتم توقيع البروتوكول 7 فبراير يعني 40 يوم فقط .. فرع اكتوبر لو بدأنا النهاردة مش هيخلص قبل 3 او 4 سنين واحنا مش هنبقى موجودين لكن بنعمل حاجة لنادي الزمالك وكانت حلم لجماهير الزمالك انا ممكن نمشي النهاردة بس بنشتغل بما يرضي الله ..
تمويل فرع اكتوبر والاستاد بتكلفة 2 مليار جنيه واقسم بالله الزمالك ما هيدفع ولا مليم ولكن في اتفاق بيتم حاليا سيتم الاعلان عنه ومش كدة وبس لا ده الزمالك هياخد فلوس .. قريب جدا سيتم البدأ في التنفيذ
2 - إجراء مزايدة للموبايل أبلكيشن وهنشوف افضل العروض المقدمة.
3 - اجرينا إتفاقية مع البنك الاهلي بتاعة "خالص" وهي تسديد الاشتراكات والعضويات عن طريق الموبايل
4- هناك دراسة وستعرض على الجهة الإدارية بتكوين شركة لكرة القدم ونطور هتكون حصة الاغلبية فيها لنادي الزمالك راس المال هيبقى حوالي مليار ونصف المليار مشيرا إلى أن فور إنشاء الشركة المبلغ المتوقع ان يحصل عليه الزمالك 600 مليون جنيه
خلوني أوجه تحية خاصة جدا وعلى رأسى من فوق لفرق اليد والسلة والطائرة لهم 15 مليون من زمان وبالرجولة اللي هما فيها دي خدوا 2 مليون ونص بس ولا حد بيتكلم ولا حد بينطق ومش معنى كدة اننا نيجي عليهم اقسم بالله احنا معاهم .. الطايرة لهم 12مليون خدوا 3 .. السلة لهم 10 خدوا 3 ..
مؤكدا إن شاء الله هنسدد كل حاجة احنا بنعتذر لهم وحقهم علينا بس ربنا عالم باللي احنا فيه والزمالك مش هياكل حق حد
بيتقال علينا كلام كتير عيب انه يتقال على اشخاص مثلنا ممكن ارد على كل حاجة بس مش بحب ولكن للصبر حدود ..

التفكير فى تقديم الاستقالة ونعمل في اجواء غير صحية
وقال رئيس اللجنة المعينة التى تدير نادى الزمالك: فكرنا اكثر من مرة تقديم استقالتنا كلجنة مش عايزين حد يشكر فينا بس تعالى اقعد مكانا وانت تشوف اللي احنا فيه .. احنا وافقنا بالمهمة حبا في الزمالك .. اللي برة ميعرفش في ايه جوا كل اللي بنتعرض له عشان موقف حصل وكان لازم يحصل واحنا بنشتغل في اجواء غير صحية لا تتناسب معنا .. مش هنسمي اسماء ولكن ابناء الزمالك هما اللي بيشتمونا طيب تعالوا كدة اقعدوا معانا اسبوع وشوفوا ..
واوضح عبد العزيز، احنا في الالعاب التانية متصدرين وكمان في الكرة متصدرين الدوري واه الموقف صعب في افريقيا بس برضو لسة الامل موجود .
واكد رئيس الزمالك، علاقتنا بكل الاندية حب وتقدير وبنتعامل مع كل الناس وهما بيتعاملوا معنا بكل احترام .. الانسان المحترم بيجبر الجميع على احترامه ..
الرياضة وسيلة للتقارب والود واللاعيبة نفسها كلهم صحاب .. مصر أكبر من الفتن والجهل والتعصب اللي احنا بنشوفه