العندليب حاضر بين جمهوره.. موقع إلكتروني يفتح أبواب بيت عبد الحليم للزوار

أعلنت أسرة العندليب الراحل عبد الحليم حافظ عن تدشين موقع إلكتروني جديد يتيح للجمهور فرصة مشاهدة منزل الفنان الكبير ومقتنياته النادرة، في خطوة تهدف إلى إحياء تراثه الفني وتقديم تجربة ثرية لعشاقه الذين ما زالوا يتابعون إرثه حتى اليوم.
وأكدت الأسرة عبر صفحتها الرسمية على موقع التواصل الاجتماعي "فيس بوك" أن هذه المبادرة تأتي ضمن خطة متكاملة للحفاظ على تاريخ عبد الحليم، مشيرة إلى أنها تعمل أيضًا على توثيق المنزل لدى منظمة اليونسكو ليُسجَّل كأحد أهم بيوت نجوم الفن في العالم العربي، وليبقى شاهدًا على مسيرة أحد أبرز رموز الغناء المصري.
وكتب أحد أفراد الأسرة منشورا،على صفحته الشخصية، جاء فيه: "بعد غيبة طويلة رجعنالكم بأخبار حلوة، عارفين إننا وحشناكم، وإن فترة قفل "صفحة بيت العندليب" كانت صعبة على كل مُحبيه.. بنعتذرلكم عن الانتظار، وعن أي وقت كنتم عايزين تزوروا فيه البيت ومكانش متاح فيه الحجز، بس كان لازم نغيب شوية عشان نرجع لكم بحاجة تليق بقيمة عبد الحليم حافظ وتليق بيكم، كان صوت عبد الحليم حافظ أكتر من مجرد غُنا، كان نبض بيت مصري، وذاكرة جيل كامل ومستقبل جيل قادم، صوته اتربّى معانا، وكلماته لسه بتزور قلوبنا كل يوم، ولأن تراثه أمانة، أسرة حليم اشتغلوا بحب وشغف عشان يحافظوا على بيته ويخلوه متاح لكل الناس".
اقرأ أيضا| فرقة القاهرة للعرائس تحصد جوائز مهرجان مصر الدولي لمسرح الطفل والعرائس
وأضاف: "النهاردة وبكل فخر بنقدّم لكم الصفحة الرسمية لمنزل حليم، الفترة اللي فاتت كانت الزيارات بتتحجز عن طريق التليفون أو رسايل الصفحة، وده كان متعب لكتير من الزوار وللأسرة ايضا، علشان كده قررنا نسهّلها عليكم، دلوقتي تقدر تحجز زيارتك بضغطه واحدة من خلال الموقع، لكن الموقع مش بس للحجز، دي هديّة منّا ليكم عشان نعيش سوا إرث العندليب، بمجرد ما تدخل الموقع، فكأنك دخلت بيته الحقيقي؛ كل ركن فيه شايل ذكرى، وكل تفصيلة بتحكي حكاية، هتلاقي فيه رحلة كاملة لحياة عبد الحليم من طفولته، لصعوباته، لشغفه اللي ما انتهاش، ولكل محطة فنية صنعت مجده، وضفنالكم كمان معرض صور للعندليب وبيته، هيخليك تحس بروح المكان حتى قبل ما تزوره فعليًا.
واكملت الصفحه قائلة: "مهمة خاصة جدا مشروع اليونسكو، عشان نقدر نسجل بيت عبد الحليم حافظ في منظمة اليونسكو كأحد بيوت رموز الفن، محتاجين دعمكم بجد!، بعد زيارتكم، تقييمكم وتعليقكم على "Google Maps" (خرائط جوجل) هو السند الحقيقي لينا. كل "ريفيو" إيجابي بيقربنا خطوة إننا نخلّد اسم العندليب عالميًا.. ونحب نفكّركم إن البيت هيفتح أبوابه للزيارة يوم 30 مارس، في ذكرى وفاة العندليب، الحجز حصري من خلال الموقع فقط، الزيارة مجانية بالكامل، وهدفنا إن كل محبّ للفن يعيش التجربة دي بنفسه، قبل الحجز، من فضلكم اقرو شروط وأحكام الزيارة علشان نحافظ مع بعض على المكان متاح وآمن للجميع، وفي ختام الكلام، بنهديكم رابط موقع بيت عبد الحليم حافظ.. الموقع اللي بيحفظ تراث أيقونة الزمن الجميل.. من دلوقتي الموقع مفتوح لاستقبال الزوّار، أما الزيارات الفعلية فهنبدأ نستقبلكم من يوم 30 مارس".