كندة علوش: تكشف «رد فعلها في حال تعرضها لموقف خيانة في الواقع»

فتحت كندة علوش، قلبها وبكل صراحة اتكلمت عن حياتها الفنية والزوجية خلال لقاءها مع الإعلامية لميس الحديدي.
وكشفت كندة علوش، عن كواليس مسلسل «إخواتي»، وطريقتها في التعامل مع المواقف الشخصية، وخاصةً الخيانة والمواجهة، وتحدثت كندة عن علاقتها بزوجها الفنان عمرو يوسف، وطباع كل منهما، مؤكدة أنها تعلمت مع الوقت كيف تدير الخلافات بحكمة، رغم طبيعتها غير الصبورة والصريحة لحد الاندفاع أحيانًا.
ومازحتها لميس الحديدي قائلة: «الصوت العالي في المسلسل كان رهيب، هو إنتي في الحقيقة بتزعقي كده؟»
وردّت كندة ضاحكة: «صوتي عالي أوقات، بس أكيد مش بزعق كده. دي طبقة صوت جديدة عليّا، ومكنتش جرّبتها قبل كده قبل (إخواتي)«.
وأضافت: «في البيت طبعًا مش بزعق كده، أكيد باقية على البيت مش هزعق كده».
اقرأ أيضا| كندة علوش تكشف علاقتها بالمطبخ وسر دخولها التمثيل صدفة
وحول مشهد الضرب في المسلسل، كشفت كندة أنه كان حقيقيًا، قائلة: «آه، كان حقيقي، والمخرج إدانا مساحة نجرّب، وفيه حاجات حصلت في التصوير ما كانتش مكتوبة، زي كسر السرير. وبعد المشهد اعتذرت له طبعًا».
ولدى سؤالها عن رد فعلها في حال تعرضت لموقف خيانة في الواقع، قالت: «أكيد لأ. ناس كتير بتسمع عن خيانة، بس وقت المواجهة محدش يعرف ممكن يعمل إيه، بس أكيد مش هتصرف زي ناهد، وأنا يمكن أكون أشيك شوية. بس بصراحة، لو حصل كده، ممكن أضرب عمرو والست اللي معاه».
وتابعت كندة أنها تفضل المواجهة على الانسحاب: «أنا مش من الناس اللي بتكتم جواها. لما بنكدس المشاعر، بيحصل فجوة، والمسافة تزيد. حتى مع أصحابي، ما بحبش أكتم، لازم أقول لو مضايقة«.
وأضافت: «الناس اللي ما بقولهمش إني زعلانة منهم، مع الوقت ببعد، لحد ما بتكون الخسارة خلاص حصلت».
واعترفت كندة بأنها صريحة بطبعها، وأحيانًا تقول كلامًا تندم عليه لاحقًا، قائلة: «أنا صريحة، واللي في قلبي على لساني، وانفعالية، وبقول حاجات من غير ما أفكر، وأحيانًا أندم على اللي بقوله».
وعن أكثر المواقف اللي ندمت عليها بسبب صراحتها، قالت: «كتير، ممكن أجرح ناس، ولو واحدة صاحبتي عملت موقف ضايقني، لازم أقول لها، لأني لو سكت، هبعد عنها وهخسرها. لكن أحيانًا الصراحة بتكون فجة».
قاطعتها لميس الحديدي متسائلة: «ممكن تعملي كده مع عمرو؟ مش كل الرجالة بتحب النصح».
لترد كندة: «عمرو ما بيحبش النصح، بس عنده ميزة حلوة إني مع الوقت تعلمت الطريقة والتوقيت. لما أحب أقول له حاجة، بختار الوقت المناسب. لو قلتها له وقت الانفعال، بخسر. وأنا بطبعي مش دبلوماسية، أنا برج ناري، وهو برج الحمل، والحمل مش سياسي، ومع الوقت لقيت إن الصياغة بعد الهدوء بتكون أفضل».
واختتمت كندة حديثها: «أنا بطبعي مش صبورة، لكن اتعلمت مع الوقت أكون أكتر هدوء في التعبير عن اللي مضايقني».