أبراج بتهرب من التجمعات| لما العزومات تبقى عبء

في زمن السرعة والضغوط اليومية، بقت التجمعات العائلية والخروجات مع الأصدقاء مش دايمًا مصدر سعادة لبعض الناس في حين إنّها بتكون لحظة انتظار وفرحة لناس كتير، في ناس تانية بتحاول بكل الطرق تفاديها أو تأجيلها، وأحيانًا بدون سبب واضح، المثير إن السلوك ده مش دايمًا بيكون مجرد عادة، لكنه ممكن يكون مرتبط بصفات فلكية معينة، بحسب ما كشفه موقع Times of India.
اقرأ أيضًا | خبيرة تكشف الأبراج «الأكثر حظًا» ضمن أبرز أحداث الأسبوع الفلكية
لو عندك صاحب أو قريب دايمًا بيعتذر في آخر لحظة، يمكن تلاقي برجه هنا
أبراج تميل لتأجيل أو الهروب من التجمعات:
برج الحوت: الحساسية أولًا
مواليد برج الحوت بيعيشوا في عالم من المشاعر والخيال، وبيميلوا للقاءات اللي فيها عمق أو طاقة إيجابية، أما المناسبات اللي فيها رسميات أو نقاشات تقليدية، فبيحسوا إنها عبء ويفضلوا ينسحبوا بهدوء أو يعتذروا قبلها بلحظات.
برج الميزان: التردد في أسوأ حالاته
أصحاب برج الميزان دايمًا في صراع داخلي لما ييجي وقت اتخاذ قرار اجتماعي،هل أروح؟ هل الوقت مناسب؟ هل هرتاح؟ أسئلة كتير بتخليهم أحيانًا يختاروا الحل الأسهل: "مش جاي دلوقتي، يمكن مرة تانية".
برج القوس: الحرية أهم من المواعيد
القوس بيحب المغامرة والعفوية، وبيبقى عنده مشكلة حقيقية مع أي حاجة مرتبة بزيادة،بالتالي، لو التجمع مترتب من قبلها بكتير، غالبًا هيتهرب ويفضل حاجة "على السريع ومن غير تحضير".
برج الدلو: الأولويات عندي أهم
مواليد الدلو دايمًا منشغلين بمشاريع وأفكار مستقبلية، وده بيخليهم يحطّوا اللقاءات الاجتماعية في آخر قايمة أولوياتهم،وحتى لو وافقوا على الحضور، ممكن يعتذروا قبلها لأنهم ببساطة لسه مركزين في حاجة تانية أهم.
برج الجوزاء: محتار ومشغول على طول
الجوزاء معروف بحبّه للناس واللمة، لكن مزاجه المتقلب وازدحام جدوله بيخلوه يختار الوقت اللي يكون فاضي فيه تمامًا علشان يستمتع،ولو اليوم مش مناسب، هيأجل أو يختصر اللقاء بشكل واضح.
التهرب من التجمعات مش دايمًا معناه قلة اهتمام أو تجاهل، لكنه أحيانًا نابع من تركيبة شخصية معقدة، أو ببساطة، من صفات البرج، سواء كنت من محبي اللمة أو من اللي بيفضّلوا العزلة، المهم تكون صادق مع نفسك وتختار اللحظة اللي تكون مرتاح فيها فعلًا.