حمزة العيلي يشيد ب"محمد سلام" بعد انسحابه من العرض المسرحي تضامناً مع فلسطين

أشاد الفنان حمزة العيلي بالنجم محمد سلام، بعد انسحابه من العرض المسرحي تضامنًا مع القضية الفلسيطنية مع سقوط الآلاف من الضحايا والشهداء، جراء القصف المدمر.
وكتب حمزة العيلي منشورًا، عبر حسابه الشخصي بموقع التواصل الاجتماعي فيسبوك، قال فيه: "محمد سلام إنسان نقي صادق، أحبه وأحترمه صديقًا وفنانًا، موقف حقيقي بمقام جهاد، لا لوم على أحد، ولكن هذا أقل ما يمكن فعله.
ونشر محمد سلام مقطع فيديو له يعلن من خلاله عدم مشاركته في المسرحية الجديدة الكوميدية "زواج إصطناعي" الذي يتم عرضها يوم 30 الجاري في المملكة العربية السعودية.
وأعرب محمد سلام عن حزنة الشديد لما يحدث في فلسطين من قتل الأطفال والنساء قائلاً: "السلام عليكم، إن شاء الله المفروض بكرة أعرض مسرحية "زواج إصطناعي" في الرياض، المفروض إن هي مسرحية كوميدية وفيها أغاني وإستعراضات، والمفروض إن إحنا هنعرض يوم 30 ونعرض في وسط الأحداث اللي بتحصل في غزة".
وتابع "سلام": "أنا مش متخيل الصراحة إني هروح وأعمل مسرحية وأهزر وأغني وأرقص وأخواتنا في فلسطين عمالين يتقتلوا ومفيش حاجة بتحصلهم وأنا مش هقدر أسافر طبعا".
وكشف محمد سلام عن سبب رفض سفره قائلاً: "ليه بقول الكلام ده في آخر لحظة المفروض إن إحنا نسافر بكرة إن شاء الله، أنا كنت على أمل طول الفترة اللي فاتت إن ممكن الموسم يتأجل أو يتلغي زي مهرجان الجونة ومهرجان القاهرة، أو حتي الموضوع يهدى في فلسطين والناس تتدخل، ونقدر نعرض بس مفيش حاجة بتحصل، لحد اللحظة اللي بتكلم فيها دلوقتي في ناس عمالة تموت ومفيش حاجة بتحصل فأنا إزاي هروح أعرض والناس بتحصلهم كده في فلسطين".
وأضاف "سلام": "سامحوني لو إحساسي مبالغ بس أنا حاسس لو عملت كده هبقا زي اللي بقتلهم بظبط إني خذلتهم مش عارف أعملهم حاجة كفاية علينا السكوت اللي إحنا في كلنا، وكمان أنا مش هبقا ساكت بس لأ ده أنا بهزر وبرقص واللي بيحصل بيحصل في فلسطين وأنا بعتذر جدًا إن أشارك في موسم الرياض".
واستكمل محمد سلام حديثه قائلاً: "المشكلة إن اللي بيحصل في فلسطين ده قضية كل مسلم في المقام الاول، لذلك واجب على كل المسلمين إن هما يساعدوا إخوانهم في غزة ويتقدملهم أي مساعدة وأنا دلوقتي مفيش أي حاجة أقدر أعملها زي زي ناس كتير جدا نفسنا نعمل حاجة ونساعد ومش قادرين نعملهم حاجة، ودلوقتي لو ربنا توفانا، ونتسأل كلنا إنت ساعدت أخوك المسلم في فلسطين عملتله ايه، اللي مقدرش يعمل حاجة هيسكت طبعا، وأنا هرد هقول ايه!؟ هقول إن الوقت اللي كان في اخواتنا الفلسطينيين بيضربوا و يموتوا منهم الأطفال والنساء، أنا كنت بعمل مسرحية كوميدية بضحك الناس وبرقص وبغني، طبعا لأ مش هقدر أعمل كده".
وأكمل: "وأنا كان عندي أمل المهرجان يتأجل أو يتلغي ولكن المهرجان ما زال قائم مليش علاقة ليه مازال قائم مش هدخل فيها ولكن أنا مش هقدر أكون جزء من اللي بيحصل وأقدر أشارك في المهرجان ده، والمفروض إن إحنا منكتفيش بالدعاء لإخواتنا في فلسطين معرفش ايه اللي يحصل بس المفروض نعمل حاجة تانية".
وتابع محمد سلام: "الفيديو ده مش مقصود منه حاجة خالص غير إن أنا فعلا في مشكلة أنا بقالي كتير جدا مش عارف أسافر ولا أعمل ايه، وامبارح كنت قاعد مع أصدقائي فنانين وفعلاً في ناس قالتلي أسافر ده مصدر رزقك وفعلاً التمثيل ده رزقي وزق أولادي واللي بصرف عليه من البيت هو التمثيل، وأنا لو مسافرتش هل هموت من الجوع أكيد لأ بس الناس هي اللي بتموت هناك في غزة".
واختتم حديثه قائلا: "ولو حد هاجمني عن التمثيل، وقال إن ده رسالة أنا معاك في ده وإن من أدخل البهجة علي قلب مؤمن له أجر طبعا ولكن السؤال مين اللي محتاجين إننا ندخل البهجة على قلبه دلوقتي!؟".
إقرأ أيضا| هالة صدقي تنضم للهلال الأحمر وتعلق: «تبرعوا لو ب 5 جنيه» لدعم الفلسطينيين