أول تعليق من خالد عليش بعد حصوله على حكم برؤية طفلته

أعلن الإعلامي خالد عليش حصوله على حكم يخص ابنته بعدما أصدرت محكمة الأسرة بمدينة 6 أكتوبر، اليوم الأربعاء، حكمًا لصالحه بإلزام مطلقته بتمكينه من رؤية صغيرته منها، لمدة 11 ساعة أسبوعيًا يوم الجمعة، بحسب شعبان سعيد محامي خالد عليش.
وكتب خالد عليش عبر صفحته على فيسبوك: "النهاردة أنا خدت حكم تاريخي يارب يتنفذ على خير وتاريخي لأنه أحسن حكم ممكن أخده واللي طلع الحكم قاضي مش واحد صاحبنا ف ده معناه إن الراجل أقره وفهم و بيدي لكل واحد حقه لكن جه الوقت اللي أقول فيه اللي جوايا حسبي الله و نعم الوكيل".
وأضاف: "أنا خصيم لكل واحد أو واحدة حتى يوم الحساب ساعدو بشكل مباشر أو غير مباشر إني ما اشوفش بنتي بطريقة انسانية كل حد كبير أو صغير جريت وراه بالمكالمات عشان أشوف اي حلول ودية" حتى الحركات و الجروبات النسوية اللي بيدافعو عن الست و خلاص أي حد بيكتب تعليق وهو مش فاهم حاجة فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم وأنا ملتزم بكافة الالتزامات المادية ناحيتها من أول يوم كاملة وزيادة كمان عن المستوى المادي و الاجتماعي اللي عايشين فيه ومع ذلك استحملت كتير و ماردتش".
وتابع خالد عليش: "أنا لا حول لي ولا قوة حاولت مع كل الحلول الرسمية و الغير الرسمية تعبت من اللف في دوائر مغلقة تعبت من نظرة والدي و والدتي المريضة اللي نفسهم يشوفو حفيدتهم ومش قادر أعملهم حاجة ده أنا أوحش رجل في العالم و لكن ما استحقش إني ما يكونش عندي فرصة اتكلم و أخرج معاها و أفسحها عشان علاقتي بيها تبقي كويسة محدش يقولي أنت السبب عشان سيبت ماماتها أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية و كل شئ نصيب و الانفصال كان برغبتها قبل رغبتي".
واستكمل: "محدش يقولي ما انتا كنت زوج وحش و .. و انا يمكن مكنتش احسن زوج برغم اني عملت اللي عليا كتير و اجتهدت كتير عشان اسعد الطرف التاني ولكن ده مش معناه اني انسان وحش و مستحقش فرصة تانية ومستحقش اشوف بنتي محدش يقولي ما انتا مبسوط و اتجوزت تاني انا فعلا الحمدلله زي الفل و مبسوط اني اخدت فرصة تانية ربنا يكرمني فيها و اكون انسان افضل و استمتعت بحق ربنا سبحانه و تعالي و المجتمع اداهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه و مطلوب مني انساه محدش يقولي ما انتا كنت بتشوفها".
واستطرد: "انا فعلا مع بداية الانفصال كنت بشوفها ساعات قليلة في الاسبوع بس مع اي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين وسط شروط كتير منها متتصورش معاها وتنزل ليها صور - متوديهاش عند اهلك - تيجي عيد الميلاد لوحدك بدون باباك او ماماتك حسيت في الوقت ده اني لازم استخدم التعاقد اللي بيني و بينها اللي بيقول اني اخد البنت يوم في الاسبوع و لكن القانون اداني حق الرؤية الطبيعي الغير انساني لطفل
فضلت 5 شهور في مساومات اني معملش تنفيذ لحكم الرؤية حفاظا على البنت و لكن ماماتها صممت وبعد التنفيذ كان مهانة و مذلة للطفلة و ليا بعدها مبقتش اروح و بعت انذار رسمي ليها بكده و مازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب".
وواصل خالد عليش حديثه قائلا: "محدش يقولي ما انتا ما بتصرفش عليها و مبهدل ماماتها في المحاكم برغم ان مش ده الموضوع بس الحمدلله الفلوس اللي الام طلبتها كنفقة و مصاريف بتوصل كل اول شهر بدون اي محاكم من اول يوم حصل بينا انفصال رسمي بدون محكمة بعقد اتفاق بينا و لو حصل دخول محاكم في اول الخلاف ف الام اللي بدأته وده بالتواريخ مش بالكلام موضوع ان في مصاريف زيادة بتطلب بشكل مبالغ فيه دي قصة تانية فيها نقاش و حوارات كتير و مع ذلك قولت انا عندي استعداد لأي زيادة غير منطقية بس نقعد و نتناقش محدش يقولي روح شوفها عند جدتها عشان انا مش هاعرف يبقي في علاقة طيبة بيني و بين بنتي وانا قاعد معاها ساعة عند جدتها و هما قاعدين جنبي و قعدتي تبقى كلها مذلة ومهانة".
وذكر: "محدش يقولي انتا بتتظاهر انك عايز تشوف بنتك لكن انت مش فارق معاك الابهات هنا اللي هيحسو قد ايه دي حاجة مؤلمة و انا مش محتاج اعمل ده و طول الوقت طلبت من اي حد قريب منهم ان احنا ننزل و نقعد و نوصل لحل وسط انا مش طالب فيه غير اني اخد بنتي يوم في الاسبوع اخرجها و ارجعها انا نفسي احس بحضن بنتي بقالي اكتر من سنة و مقعدش اتكلم في مشاكل حصلت من سنين انا اوحش رجل في العالم بس حقي اخد فرصة عشان تكون في علاقة كويسة بيني و بين بنتي حسبي الله و نعم الوكيل".
واختتم: "شكرا للاستاذ شعبان سعيد المحامي و ربنا يكملها بخير شكرا ميريهان زوجتي انك مستحملة كل ده و في ضهري و مؤمنة بيا".
ترجع وقائع الدعوى إلى أنه بعد انفصال الإعلامي عن طليقته، أراد حل الأمور بطريقة ودية فحرر عقد اتفاق مع طليقته وأسرتها، قرر فيه التزامه بكافة نفقات ومصاريف الطفلة الصغيرة، مقابل السماح له برؤية ابنته بطريقة أدمية، وبعيدًا عن مراكز الرؤية.
وتابعت الدعوى أنه رغم التزام الإعلامي خالد عليش، بتنفيذ ما تم الاتفاق عليه خلال العقد، إلا أنه فوجئ بمطلقته ترفض تنفيذ بنود العقد و تتحايل علي الية تنفيذه فاضطر الي اللجوء للمحكمة و التي بدورها اصدرت حكم رؤية في مركز شباب، وهو ما يضر به وبطفلته الصغيرة، وحاول عليش جاهدا بعدم تنفيذه، و الوصول لحل ودي مع الأم بدون جدوى، مما جعله يلجئ لمحكمة الأسرة مرة أخرى، وتوضيح الأمر لهيئة المحكمة.
وتم تداول الدعوى أمام محكمة الأسرة بمدينة 6 أكتوبر، وحضر الإعلامي خالد عليش في جلسة الحكم، وتحدث عن معاناته وحرمانه من رؤية نجلته الصغيرة.
وقدم شعبان سعيد المحامي بالنقض، دفاع "عليش" خلال الجلسة ما يفيد بتسديد موكله لكافة النفقات والمصروفات الخاصة بالطفلة وبمدرستها الدولية حتى تاريخه.
وأصدرت المحكمة حكمها بما فرضته مطلقته بنفسها على نفسها، وإلزامها بتمكينه من رؤية صغيرته أسبوعيًا لمدة 11 ساعة يوم الجمعة.