تطور جديد حدث في الأزمة التي شغلت الرأي العام ومواقع السوشيال ميديا والمواقع الإخبارية على مدار ال48 ساعة الماضية، وهي الخاصة بالفنانة المعتزلة حلا شيحة وأزمة فيلمها الجديد "مش أنا" مع الفنان تامر حسني. وبعد تصريحات والدها ردت حلا عليها بتصريح نشرته على حسابها الخاص بإنستجرام مصحوباً بصورة لزوجها الداعية والمنتج معز مسعود، تكذب فيه ما قاله والدها حيث كتبت: «الحقيقة مصدومة من الكلام اللي والدي قاله عن زوجي اللي اتجوزته بكامل إرادتي والحمد لله لقيت معاه كل المعاني الجميلة من احترام ورجولة وشهامة نادرة الأيام دي، وأنا لم يخطفني أحد كما قال والدي والكلام ده لا يصح أبداً». وأضافت: «أنا بحب زوجي وسعيدة بحبه ليا وبنحترم بعض ومعز بيحترم رأيي وبيقدر مشاعري وبالعكس هو دائما بيهدّيني.. وطبعا بيساندني ويشجعني لأني زوجته وحبيبته، وهو أكبر بكتير من كل الكلام اللي بيتقال عليه وافتراءات مش صحيحة وهو أبعد ما يكون عنها». وتابعت: «لن أسمح لأحد الكلام عنه ولن أسمح بأي تصور خاطئ عنه بأي شكل من الاشكال معز طول عمره له رؤيته الواضحة في الدين وحتي في الفن وهو ليس مع اي جماعة او فئة معينة هو يمثل نفسه وله أفكاره وآرائه العلمية والدينية المختلفة الجميلة وليس لاحد ان يصنفه او يضعه في اي قالب فقط لأن هواه لا يوافق ما يمثله معز، هو في ايه في بلدنا الايام دي بنحارب ونصارع في بعض وعايشين في قصص وهمية من نسج خيالنا عن بعض». وأكملت: «هو خلاص أي حد يتكلم بلغة الدين لازم يبقي متطرف او اخواني هو مبقاش في مسلمين وسطيين طبيعين هو ليه كل انواع الهجوم ده علي اي حد، انا زعلانة من والدي جداً لانه يعرف معز كويس جدا وقعدوا مع بعض كتير ووالدي يحبه جدا وشاف منه كل خير.. معز زيي اتجوز 14 سنة من عمره وكان مستقر في حياته وعنده ثلاث اولاد ربنا يخليهمله جمال ما شاء الله وعمره ما كان بتاع ستات زي ما بيتقال كلام لا يليق ابدا وفي الاخر زيي لم يكمل جوازه وحدث الطلاق وكلنا معرضين لده طبيعي انه كان بيحاول زي أي راجل محترم انه يلاقي استقرار في حياته في الحلال ومتوفقش اكتر من مرة ودي مش حاجة تعيب أي حد، والحمد لله اتقابلنا وتلاقينا لان ظروفنا قريبة جدا وعندي اولاد مثله واولادنا شبه بعض الحمد لله واستقرينا احنا الاتنين ليه ده يزعل الناس بدل ما ندعي لبعض بالخير بقينا نتصيد لبعض و نخوض في اعراض بعض هو حصل في مجتمعنا ده احنا جرالنا ايه». واختتمت كلامها قائلة: «في الآخر بوجه كلمة لوالدي الحبيب إن لا يصح ابدا كلامك مع كامل احترامي لك وللجميع، أنا الحمد لله سعيدة في حياتي ومع زوج أتشرف انه زوجي وبعتز بيه واحنا اصدقاء قبل ان نكون أزواج، وكل كلمة اكتبها وقلتها نابعة مني وانا متدينة بطبعي زي اي ست مصرية بتحب دينها وده لا يعيبني. وتديني اللي بدأ من اكتر من 15 سنة من المنطقي ان معز مش هو سببه مش محتاجة حد يخطفني أو يكتب عني او يوجهني.. هذا كلام لا يليق. دعوا الخلق للخالق وكل واحد يخليه في حاله. وياريت نسمع من بعض بدل ما نسمع عن بعض.. أحسنوا الظن».
