«أمهات مصر»: «مش عايزين عيالنا ينجحوا من غير امتحان بس راعي تخفيف المناهج»

قالت عبير أحمد، مؤسس اتحاد أمهات مصر للنهوض بالتعليم، إن هناك ردود أفعال واسعة من جانب أولياء الأمور، علي تصريحات وزير خلال مداخله علي برنامج مساء dmc، حيث قال الوزير: "لو المدارس اتقفلت ومكملناش العام الدراسي مفيش حد هينجح مش هنعمل زي السنة اللي فاتت وتنجح بتيرم واحد".
وتفاعل مئات أولياء الأمور من الأمهات علي صفحة اتحاد أمهات مصر للنهوض بالتعليم، وصفحة ائتلاف أولياء أمور المدارس الخاصة، في الفيس بوك، حيث قالت ولي أمر: "تمام ماشي، واحنا مقولناش عايزين عيالنا ينجحوا من غير امتحان، بس يراعي ربنا فى الإجراءات الاحترازية وقت الامتحانات، ولو شايف إن المنهج كتير على العيال إنهم يفهمو اللى هيتبقى من الشاشات فيتقي الله ويحذف جزء منه، دا كفاية مادة الدراسات من السنوات السابقة".
وأضافت ولي أمر أخرى: "إيه المشكلة يعنى لما الدراسة تبقى أون لاين ونروح على الامتحانات بس ويبقى فيه إجراءات احترازية كويس، بس المفروض يخلى جزء من المنهج للإطلاع فقط".
وتابعت أخري: "مابنقولش تتقفل ولا نتمني تتقفل، بس يوم مايظهر حالات لازم تقفل المدرسة يومين تتعقم على الأقل ويبقى فيه اهتمام بالإجراءات الاحترازية والتزام وحسم ويكون فيه جهة مختصة بالتفتيش على اللي بيتم في المدارس، احنا عايشين في رعب ومضطرين ننزل ولادنا وربنا يحفظهم جميعا".
واستكملت أخرى: "هى الحمد لله لغاية دلوقتى آمنة لكن كمان شهر مش هتكون آمنة لاقدر الله ولازم يكون فيه خطة واضحة في حالة الأزمة لاقدر الله يعني بلاش نكون رد فعل".
اقرأ أيضا وزير التربية والتعليم: «مش هنقفل المدارس ونقعد نلعب»