حضرتك تحب تعمل استمارة تمرد؟!....مستنينك يوم 30 إن شاء الله.. اللي هينزل يوم 30 يجيب معاه كارت أحمر وصفارة. تنشتر هذه الجمل في ميادين وشوارع مصر حاليا، دعوة للنزول يوم 30 يونيو المقبل للإطاحة بمرسي و عمل انتخابات رئاسية مبكرة. و حتي الآن السيناريو الخاص بيوم 30 لم يحدد بعد، ولكن قال الشارع المصري تنبؤاته، كالتالي : قالت "أسماء" أنا مليت استمارة تمرد، وهشارك بكل قوتي في يوم 30، أنا من الأول مكنتش عاوزة مرسي و هو بيأكدلي إني كنت صح باللي بيعمله في البلد، و متوقعة إن الإخوان هينزلوا ويضربوا فينا ويستخدموا الأسلحة وفي الآخر يقولوا مش احنا دول شوية بلطجية. و علقت "سمية" رأيي إن اللي بينادي بالنزول سواء إخوان أو غير إخوان عاوز يخرب البلد ومش بيحبها، و متوقعة إن الناس تخاف تنزل عشان عارفين إن الإخوان مش سهلين، أو الناس تعاند وتنزل ويحصل أشتباكات احنا في غنا عنها. و أجاب "سمير" هنموت يعني لما ننزل يوم 30؟! منموت محنا أصلا كل يوم بنموت 100 مرة على الأقل نزولنا هيخلينا نموت بكرامة مش بذل وإهانة، هيحصل إيه بقى فمحدش عارف إيه المستخبي. ويرى "رؤوف" أن الشعب في حالة احتراق داخلي قد يدفعه إلى القيام بأي شيء دون خوف، و الجيش هيدافع عن نفسه في حالة تعرض أي شخص ليه وخصوصا إن الجيش نفسه في حالة يرثى لها، أما الإخوان فمعتقدش إنهم هيرضوا يسيبوا الكرسي وبردو مش هيسكتوا لو أي حد فكر يقولهم امشوا. و تقول "منال" أعتقد أن يوم 30 هو ثورة 25 يناير جديدة، نفس الأزمة بتفاصيل أصعب لأن الجرح الذي أصابنا تلك المرة أعمق وخيبة الأمل تزيد الألم، و لا أعتقد أن يمر هذا اليوم بسلام، و للأسف الشعب هو الضحية.