شاي بالياسمين

سؤال.. هل تظن ان كل المخالفات أو الحاجات غير المشروعة التي يرتكبها بعض اعضاء مجلس الشعب يتم كشفها كلها.. الاجابة.. لأ.. طبعا.. ولعلمك.. اللي ما بيتعرفش من البلاوي دي اكتر بكتير من اللي بيتعرف.. بس هي.. حظوظ واحد »بيتقفش« وعشرة.. لا.. وخليني »اسليك« واحكي لك علي حكاية حصلت وصاحبها لم ينكشف بعد.. بس ربك يمهل ولا يهمل.. كان يا مكان في واحد من رجال الاعمال التقال داخل في مشروع بالمليارات، وبعد ما بدأ في تنفيذ المشروع.. احدي الجهات الحكومية اعترضت عليه مع انه واخد موافقة من رئيس الوزراء ذات نفسه.. واصبح المشروع معلقا.. اتبني نصه وبقيته لسه.. يقوم صاحبنا النائب يشغل حاسته الدولارية والبنكنوتية.. ويدخل علي »الخط« مستغلا ان رجل الاعمال نفسه ومني عينه المشروع يمشي بأي طريقة.. لانه مكلفه ملايين.. فيقدم طلب احاطة لمجلس الشعب لمناقشة اسباب توقف المشروع.. وينطرح الموضوع في احدي لجان المجلس.. ويمسك النائب الميكروفون ويلعن »سنسفيل« ابوالمشروع والبلاوي اللي حيتسبب فيها.. فيرد اصحاب المشروع بان ما قيل بعيدا عن الحقيقة وان المشروع سيفيد البلد كلها.. فيقترح النائب نفسه وحسما للموضوع ان تقوم اللجنة بزيارة للمشروع علي الطبيعة.. قال يعني حقاني قوي.. فتؤجل اللجنة قرارها.. وقبل ما تتم الزيارة يرسل رجل الاعمال لصاحبنا النائب يدعوه لشرب »شاي بالياسمين«.. ويلبس علي بابا بعد الضنا حرير في حرير.. بعدها مباشرة يتغير كلام النائب 180 درجة.. ويقف أمام اعضاء اللجنة ليعدد مآثر المشروع واهميته مطالبا بسرعة تنفيذه.. لانه يعد من اهم واكبر المشروعات الحيوية.. وتخلص الحدوتة.. ولم »تنكشف« لانها تمت كلها في الضلمة وتحت الترابيزة.. وبصراحة انا ماكنتش ناوي احكيها لكني وجدت نفس النائب يعيد الكرة مرة اخري بس المرة دي مع رئيس شركة.. وحتسألني طيب طالما حكيت.. ما تقول اسمه.. حاقولك.. واحد ربنا ساتره لغاية دلوقتي اجي انا وافضحه!!.. طول عمري مقتنع بان جواز عتريس من فؤادة باطل.