حگم نفقة

فيه حاجة.. محيراني.. هوه الرئيس السابق.. متهم علي ذمة قضية، سرقة غسيل وعشة فراخ .. ام هو رئيس تم خلعه، وتجري محاكمته.. علي افعال وسياسات »نكلت« وسحلت وجوعت ودمرت وأفسدت عيشة »غالبية« الشعب.. والله انا حاسس اننا »بنتسحب« لمنطقة غير المفروض نكون فيها.. فالمتابع لما يدور.. يري ان الرئيس السابق »يتمتع« بكل مميزات ومزايا رئيس جمهورية.. ولم ينتقص من تلك المميزات شيء.. اللهم إلا اننا »اضفنا« له كلمة سابق بجوار وظيفة سيادته.. فالرئيس.. ومع انه » سابق «.. يتحرك.. رئيسا.. ومنزله أو محل اقامته في مصر الجديدة حوله وأمامه وخلفه حراسة كاملة متكاملة، والحواجز الحديدية مازالت »قائمة« والتفتيش لكل الداخلين والخارجين إلي المنطقة.. شغال، وحتي محطة البنزين.. المجاورة لمنزله من علي بعد.. مازالت مهجورة وكأنه.. مازال في بيته.. رئيسا.. لم يخلع، ولم يعد سابقا.. وهذا هو الوضع اللي محيرني.. فرغم دلالاته لمن يفهم إلا انه لم يشغل بال احد.. والكل فرحانين.. قوي.. انهم شايفين رئيس في القفص »بيتفرجوا« عليه، وبيعدوا له كام مرة لعب في مناخيره. ومش واخدين بالهم ان مش هما اللي بيتفرجوا.. لا ده الرئيس هو اللي بيتفرج عليهم.. لانه متأكد اننا »مضحوك« علينا، وان التهم اللي وجهت له .. حتنزل كلها علي فاشوش.. وده سهل.. تفهمه وتقراه من بين سطور طلب محاميه للمحكمة انها تجيب اسعار بيع الفيلل في شرم الشيخ في توقيت شراء الرئيس لفيلته.. لان وقتها كانت شرم بتقول يا هادي.. وايامها كان المستثمرين بيبيعوا بأسعار قليلة علشان تشجع الناس علي الشراء، وهو ماسيثبت الرئيس لم تتم مجاملته في سعر فيلته.. يعني »براءة«.. وحتي قضية قتل »الثوار« اللي الكل حاطين عليها »امل انه »ينطس« فيها حكم. انا باقولك اهوه.. انها حتحصل اللي قبلها.. بعد ما محامي »العادلي« »شرك« القضية وأثبت ان مفيش رصاص »حي« انضرب في التحرير، وان »الخرطوش« اللي وجد تم ضربه من »بنادق« مختلفة يعني مش كلها »شرطة«.. وحتي الفوارغ »المتحرزة« لم »تحرزها« النيابة من مكان الحادث.. وانما »جابها« حبة »اشخاص« لم يتم حتي سؤالهم عن مصدرها.. وهذا خطأ جنائي.. ده غير ان الدفاع بتاع الرئيس لسه هايشكك في ان الشهدا ماتوا في الميدان وحقيقة ان منهم من اتحسب شهيد وهو مرمي من فوق سطوح عمارة، واذا حصل ده وهذا ما اتوقعه تماما لاننا »بننسحب.. سنكون وبكل سذاجة وعباطة قد حولنا »الرئيس« السابق من متهم بأنه »خربها« وقعد علي تلها، وملاها عواطلية وعصبجية وشحاتين، وسحل بكرامة الشعب الارض إلي »واحد« عليه حكم »نفقة«.
عارف ليه الرئيس السابق بيتحاكم..
لانه ما اختارش اللي يعتمد عليه .. والا اللي يشيله وقت الزنقة »قطونيل«!!