يا ريت الأجازة تطول!

يا مجلس الشعب يا ريت الاجازة تطول
والشعب يرتاح من كتر الكلام والقول
ليكم سنين تصدروا كل يوم قوانين
والشعب تعبان مش لاقي لمشاكله حلول!
المصري عايز رغيف بسهولة يقدر يجيبه
وعلاج في مستشفي يقدر عليه جيبه
وسكن ينام فيه حتي ولو أوضة
ووظيفة لابنه مش لابن العضو وقريبه
عايزين نشوف يا ناس لينا في البرلمان نواب
بيناقشوا بعلم وجراءة ورأيهم دايما صواب
خايفين علي مصر وبيحافظوا علي خيرها
وبيخدموا الناس اللي عايشة في تعب وعذاب!
فتحي وسيلي مجلع
موجه عام بالتعليم الفني بالمعاش - أسيوط