شعر

علشان بنت؟

هوا علشان كوني بنت كل حاجة ليها حد؟ يعني إيه اني كبرت.
واني ارضي بأي حد؟
طول حياتي وفي حدود
كل لحظة وكل وقت
في حواجز في سدود
كل دا إكمني بنت‏.‏
كل شيء معدود عليا
فين خرجت وإيه لبست
كل شيء محسوب عليا
لو ضحكت او ابتسمت
اي حاجة ولو بريئة
تتعمل قصة وحكاية
مش مهم تكون حقيقة
المهم تكون حكاية‏..‏
في كمان بردو ملاحظة
إللي ممكن يحكي عنك
مش هيتردد في لحظة
لو في حاجة يطولها منك‏.‏
كل دا وانا كنت راضية
ديه تقاليدنا وعاداتنا
بحترم كونها محافظة
حتي لو ظلمت بناتنا‏.‏
واللي حتي مش بخاطري
بردو م المحسوب عليا
مستوي جمالي وشكلي
كل دا بيحكم عليا
بس حتي شريك حياتي
مش بإيدي انا الاختيار
لو عاجبني واحد قصادي
اختياري الانتظار‏.‏
لا غني ولا جاه طلبت
بس عايزة اللي أحبه
عمري ما كان ليا شرط
إلا قلبي يحس قلبه‏.‏
وقتي ضاع وما كانش ذنبي
وتقلولي السن عدي؟
لازم اكتم نبض قلبي؟
اي حد انا لازم ارضي؟
مجتمع ظالم وقاسي
عمره يوم ما حس بيا
ليه يا أهلي وليه ناسي
بتلوموني وأنا الضحية؟
محمد عمر
‏momarih@yahoo.com‏

إضافة تعليق

البيانات مطلوبة

اسمك
*


بريد الالكترونى *
البريد الالكتروني غير صحيح

عنوان التعليق *


تعليق
*