سلمى صباحى: كان عندنا أمل لآخر لحظة.. لكن قدر الله وماشاء فعل

بعد دقائق قليلة، من إعلان لجنة انتخابات الرئاسة لنتيجة ماراثون السباق الرئاسي، كتبت المذيعة سلمى صباحى ابنة المرشح حمدين صباحى بعض الكلمات وجهت فيها الشكر إلى والدها لخوضه جولة الانتخابات مع مرشحين استخدموه طرق غير مشروعة على حد وصفها، وأنه رغم النتيجة النهائية إلا أن حب الناس لحمدين صباحى الذى ظهر في الأيام الأخيرة كان مفرحاً ومؤثراً.
وفيما يلى نص الرسالة، التى كتبتها سلمى صباحى ل "والدها" على صفحتها الشخصية بموقع "فيسبوك":
كان عندنا أمل لآخر لحظة لكن قدّر الله وما شاء فعل ..كل حاجة ربنا بيعملها لحكمه يمكن منعرفهاش غير متأخر .. اللي حصل اليومين اللي فاتوا دول بالرغم من النتيجة حقيقي يفرح،، ربنا كرم حمدين صباحي بحب واحترام عظيم ،، بحكم معرفتي بيه على مدار 30 سنه أقدر اقول إن ربنا نصره فعلا ،، حمدين صباحي طول عمره مناضل وعاشق حقيقي لمصر ومنتمي فعلا للناس وطول عمره متعتم عليه تعتيم اعلامي متعمد وطول عمره بيدفع تمن كلمة الحق اللي بيقولها في وش الظالم بسجنه وأحيانا تعذيبه .. نادى بكل المعاني النبيله اللي نادت بيها الثوره من قبل الثوره بسنين طويلة ،، ولم يقبل يوم ان يتنازل عن مبادئه أبدا ..
حب الناس لحمدين أنا شفته بعيني في بلدنا بلطيم من زمان ،، وشفته دلوأتي في مصر كلها ،، وده نصر عظيم ،، حملته الرائعه الفقيره جدا ماديا والغنيه جدا جدا جدا حبا وإخلاصا ،، أهالي الشهداء الطاهرين اللي صوتهم لحمدين ،، الشباب الحر اللي حلم نفس حلمه وكان نفسه يحققه معاه وصوتهم لحمدين ،، الناس البسيطة اللي صدقته وحبته لله في لله وحست انها هتعيش بكرامه معاه وصوتهم لحمدين .. كل ده نصر عظيم لازم يفرحنا .. محدش يزعل من النتيجه عشان في كل الأحوال ربنا دايما بيظهر الحق لكن حكمته في اختيار التوقيت اكيد هنعرفها لما يريد ..
مصر بلدنا واحنا ولادها ..
مش هننسى دم شهدانا، ثورتنا مستمرة وهنحقق مطالبها في ظل أي نظام ..احنا الشعب اللي ثار ومحدش هيقدر يقهره تاني .. وهنكمل حلمنا معاك يا حمدين عشان لقينا فيك قائد ثورتنا ..
شكرا إنك نافست بقوة وطهارة وشرف مع منافسين للأسف استخدموا طرق غير شريفة وانتصرت أنت بحب الناس ..
وشكرا لأنك انسان بجد ودايما بتمدنا بالأمل والتفاؤل ..
فخوره جدا إن صوتي ليك ..
وفخوره جدا أني أتربيت على أيديك ..
سلمى حمدين صباحي