السيسي: المستشفيات لا تليق بالمواطن والبلد مفهاش فلوس.. ومينفعش نمشي "تاتا تاتا".. ولازم المسئولين يدققوا في صرف كل جنيه

هاني بدر الدين
طالب الرئيس عبد الفتاح السيسي رئيس الجمهورية القائد الاعلى للقوات المسلحة، من المسئولين بالحكومة التدقيق في صرف كل جنيه، نظرا لعدم وجود أموال بدرجة كافية يمكن من خلالها الانفاق على تحسين مستوى الخدمات الصحية والتعليمية وغيرها.
جاء ذلك خلال حضور الرئيس السيسي يرافقه الفريق أول صدقي صبحي القائد العام للقوات المسلحة وزير الدفاع والانتاج الحربي، المرحلة الثالثة لاعمال التطوير والتحديث بالمجمع الطبي للقوات المسلحة بكوبري القبة.
وقال السيسي بلهجة حادة إلى حد ما "أنا بطلب من كل مسئولي الحكومة إنهم يعرضوا علي ّ مشروعاتهم اللي حيعملوها، عشان ممكن نقدر نوفر من مصروفات الإنشاءات وغيرها، بشرط نفس الجودة والكفاءة، ولا بد من أن يتم البناء وتنفيذ المشروعات بسرعة أكبر، ومينفعش نمشي "تاتا تاتا".
وأضاف السيسي "القوات المسلحة تطبق تلك المبادئ، وعشان كده بنقدر نشوف تنفيذ المشروعات بسرعة وبكفاءة ودقة، وبنقدر نوفر من النفقات عشان ده فلوس الشعب،وعايزين القواعد دي تطبقها الحكومة والدولة كلها".
ووجه السيسي انتقادا ضمنيا لبعض مسئولي الحكومة الذين يصدرون قرارات جزاء ضد بعض موظفي الجهاز الاداري للدولة مثل المستشفيات قائلا "ميزانية وزارة الصحة تذهب معظمها مرتبات، والدولة مفهاش فلوس إننا نقدر نخلي مستوى المستشفيات يليق بالمواطن، وعشان نحقق ده محتاجين عشرات المليارات وللأسف ده مش موجود، وعشان كده لازم نشجع الموظفين والدكاترة عليهم عشان هما مبياخدوش المرتبات اللي يستحقوها، مش نديهم جزاءات".
ومضى السيسي يقول "مينفعش حد يتكلم دلوقتي عن النزاهة، لإن خلاص مفيش فلوس إن حد يسرقها، ومينفعش أي حد يفكر ياخد فلوس الدولة.. ده دم الشعب المصري.. إحنا محتاجين إن الناس تعطي مصر".