جاهين ميلاد يتجدد

الاسم زي الجواهر في الضلام يلمع‏.‏ تسمع كلامه ساعات تضحك ساعات تدمع شاعر عظيم الهبات‏. ..‏ معني ومبني ياخال
يشوف إذا عتمت واتشبرت لاحوال
كإنه شاعر ربابة‏..‏ ساكن الموال
يقول‏..‏ وحتي إن ماقالش تحس إنه قال
ولا يقول م الكلام إلا اللي راح ينفع‏!!
‏المسألة مش قوافي قد ما هي رؤي‏..‏
الكون في إيد البصير أصغر من البندقة
وضحكة الفيلسوف متجمعة من شقا
تفتحها تقفل عليك‏..‏ مسا ده ولا صباح؟
والصوت ده وسط الفرح زغروتة والا نواح؟
يا بهجة الدنيا يا غنيوة الأفراح
أكلوا تمورك وراضي لو صابوك بالنقا‏!!‏
‏___‏
نزل من بطن أمه‏..‏
بصراخ موزون مقفي
وكإن فنه‏..‏ دمه
وتقيل مع إنه خفه واسمه‏..‏ جاهين
من صغره آخر شقاوة
وله أمور عجيبة
يرسم رسومات نقاوة
ويقول حاجات غريبة تأليف صلاح جاهين
‏___‏
يتهيألك مكشر
هوه بيضحك لجوه
وحتي لو يكركر
الوش‏..‏ هوه هوه ماركة صلاح جاهين
‏___‏
والده‏-‏ وأنا شفته‏-‏ قاضي
يزوره ف مكتبه‏:‏
أبويا‏..‏ دايما راضي
وأنا نفسي أكتبه وامضي‏:‏ صلاح جاهين
‏___‏
يرسم يقرا الشوارع
والخلق في الحواري
وفي النظر كان بارع
للبايع‏..‏ واللي شاري وارسم يا صلاح جاهين
‏___‏
وإن حب الرسمة تنطق
يرسم واحد تخين
تتحير لو تدقق
ده سعيد والا حزين تلاقيه صلاح جاهين
‏___‏
يرسم يرفع ورقته
يبعدها‏..‏ ويقربها
ويسألنا‏:‏ انبسطتوا؟
كإنه‏...‏ بيجربها فينا‏..‏ صلاح جاهين
‏___‏
وكان يغني وطنه
بقلبه‏..‏ وبضميره
وكان عايش في زمنه
مش في زمن حد غيره ما اسموش صلاح جاهين
‏___‏
وتعالي شوف يا صلاح
اللي جري م اللي كان
سرقوا لون الصباح
وبهجة المكان‏..‏ ومكان صلاح جاهين
‏___‏
الظلم كبر‏..‏ وسادد
مصرك ماعادتش هيه
أضيق من القصايد
وأوسع من رباعية كتبها صلاح جاهين
‏___‏
عاش عمره يشبه نفسه
وفي صدقه شخص عادي
أمله رماه ليأسه
قالك‏:‏ بلاش السنادي ورحل صلاح جاهين
‏___‏
وكل ما جسده غاب
الراجل الأصيل
يحضر من الغياب
حانن لنهر النيل وامضة صلاح جاهين