مشطوب من الدفتر

أنا باسأل سؤال واحد ومستنى تجاوبينى أنا ولدك ومن بطنك واخويا اللى جرح عينى ومش من ضُرَّه أو من بره يا ام الدنيا جبتينى دا أصل الطرح من بطنك ومش من هندى ولا صيني
ولو ولدك أخويا يعيش
فى أحسابك
وأنسابك
وانا فى الطل ترمينى
مانا برضه تعبت كتير
ولو نقعد ونتحاسب
ياريت نقعد
تحاسبينى.

أنا مشطوب من الدفتر
ومش حاظهر
على الصفحة
ولا الهامش يكفينى
دا شىء محسوب ومتقدر
وألف صباع طرف عينى
أنا مفطوم
ومن بدرى
وطال صبرى
ولما كبرت سبتينى
بقت كراسيكى تتورث
وظلم الواسطة يتدرّس
وصفحة عيلتى فى السلطة
أكيد أنضف من الصينى
ولا عايز كراسيكى
ويخت لبر مراسيكى
يعدينى
واشيل السيف
وعودك آدى وش الضيف
وتنسينى
ومهما كتمتى أنفاسى
وجوه الروح حبستينى
أنا باعشق تراب قدمك
ولو حتى كرهتينى
وحبك فى الحشا ثابت
واسمك ناقشُه فى جبينى
هواكى معدِّى فى كيانى
يا معجونة
فى تَكوينى ...