بعبارات خادشة للحياء.. الجمهور يهاجم اسما شريف منير

لليوم الثاني على التوالي يتواجد اسم اسما شريف منير في قائمة الأكثر بحثًا بموقع جوجل، وذلك بعد أن وصفت الإمام محمد متولي الشعراوي بالمتطرف ثم اعتذرت مشيرة إلى أنها خانها التعبير، وتلقت اسما شريف منير الكثير من التعليقات المسيئة لها ولأسرتها وخاصًة والدها النجم شريف منير الذي حرص على الدفاع عن ابنته عبر حسابه بموقع التواصل الإجتماعي "فيسبوك".
شريف منير
اسما شريف منير
ونشر شريف منير عبر حسابه مجموعة من العبارات الخادشة للحياء التي تعرضت لها ابنته اسما شريف منير، وكتب: "تفتكروا لو فضيلة الإمام.. محمد متولي الشعراوي على قيد الحياة.. وقرأ دفاع الناس عنه وعن الدين الإسلامي بالتعليقات دي .. كان هيبقى رأيه إيه ؟".
وتابع: "ملحوظة: أنا آسف على الألفاظ النابية إللي أكيد يعاقب عليها القانون، متهيألى مش محتاج أعمل محضر في مباحث الإنترنت عن الأشخاص المحترمين إللي علّقوا .. أكيد عندهم علم، ده جزء بسيط من مجمل التعليقات المؤذية ليا ولبنتي ولكل إللي عيلتي" .
وأضافت: "يا ريت كل أب و كل بنت يحطّوا نفسهم مكاني .. أنا وبنتي .. محمد ناصر طلع في قناة مكملين وقال .. إني ماكنتش معترف إن أسما بنتي .. ولسه معترف بيها قريب بعد مشاكل بيني و بين والدتها الله يرحمها، إنتوا متخيلين الإفتراء والخوض في الأعراض وصل لفين ؟ محمد ناصر وكل اللي علقوا بالأذى ده .. أنا إشتكيتكم لربنا . وهتشوفوا النتيجة قريب جداً .. ده إحساسي إللي أنا مصدقه ..آسف للإطالة".
اعتذار اسما شريف منير على الهواء
اعتذرت أسما شريف منير، مقدمة برنامج "أنا وبنتي"، المذاع على فضائية "أون أي" عن وصفها للشيخ الشعراوي بالمتطرف قائلة: "أنا مش هقول كلمة تطرف تاني في حياتي لحد ما أموت".
وقالت خلال مداخلة هاتفية ببرنامج "الحكاية" الذي يقدمه الإعلامي عمرو أديب: "أنا مش مصدقة أي حاجة من امبارح ومش عارفة إيه اللي بيحصل، الموضوع ابتدا أن الفترة اللي فاتت كنت تعبانة صحيا ونفسيا فطلبت ترشيح أسماء لشيوخ اسمعلهم وأنا محتاجة اقرب لربنا فكتبت فكتبوا لي شيوخ كتير فحد كتبلي الشيخ متولي الشعراوي".
وتابعت: "فرديت تعليق وعايزة أموت نفسي إن قلت كده والله العظيم، قلت كنت بشوفه ومش بفهم حاجة ولما كبرت شفت حاجة فيها تطرف ومش هقول الكلمة دي تاني وما استوعبتش إيه اللي حصل وكنت بقولها بمنتهى العفوية ولقيت أخبار كتير جدا ولقيت ناس بتقول عايز اعمل تريند واتشتمت بأمي وبأهلي وأبويا واختاروا لي صورة وبيحطوها جنب فضيلة الشيخ علشان تستفز الناس".
وعلقت أسما شريف منير على الضجة الاعلامية التي أحدثتها بعد وصفها الشيخ الشعراوي بالمتطرف قائلة:"اعتذرت فلماذا نخوض في الشتيمة والسب والطعن في أعراض الناس.
وقالت اسما خلال مداخلة هاتفية مع الإعلامي عمرو أديب في برنامج "الحكاية" المذاع على فضائية mbc مصر إن الذين يطعنون في أعراض الناس في الشريعة يسمى قاذف ويعاقب شرعًا مؤكدة : إذا كان الشيخ الشعراوي عايش كان رحب بها في بيته وسامحها.
وأضافت أسما أنها ليست طبيعتها على الإطلاق ممارسة "التنمر" و "البادي شيمينج" وإنها مضيفة أن الشيخ الشعرواي لو كان عايش مكنش رد فعله هيكون عنيف.
اعتذار اسما شريف منير
وحرصت على الإعتذار عبر حسابها بموقع التواصل الإجتماعي "فيسبوك"، حيث كتبت: " حصل بينى وبين شخص حوار اسأت فيه التعبير عن اللي عايزه أقوله و حساه، اتفهم فهم كلامى علي انى انتقد فضيلة الشيخ متولي الشعراوى انا بتكلم من غير ما بحسب كلامي و انا مقصدش باي حال من الاحوال اني اغلط أو يوصل كلامي بشكل غلط كده".
وتابعت اسما شريف منير حديثها وقالت: "انا مش بقيم فضيلة الامام ، انا عموما عمري ما احب اغلط في حد.. وانا باعتذر جدا جدا عشان لم استطع ان احسن التعبير واختيار الكلمات الصحيحة وده يمكن عشان لسه بتعلم و ده عن عدم ادراك انا لسه بتكلم علي طبيعتي زي اول يوم قررت اني اظهر علي السوشيل ميديا، بس دلوقتي لازم اخد بالي من كل كلمه بقولها عشان كل حاجه بتتحسب عاليا و ده جديد عليا".
واختتمت كلامها وقالت: " كل ما في الموضوع اني كنت بدور عن مرجع دينى و دروس دينية عشان افهم بشكل مبسط وعشان افهمه كنت محتاجه حاجه تناسب استيعابي، والشيخ الشعراوى أعمق من قدراتى لأني في حاجات فعلاً مفهمتهاش، وانا مبتدئة بحاول اتعلم و اقرب اكتر من ربنا، وعموما انا بعتذر فعلا عن ذلت لساني وكلمتى.. وحقيقي انى اكن للشيخ الشعراوى كل احترام وتقدير رحمه الله وجزاه كل خير.. وربنا عالم نيتي ايه".
اسما شريف منير
اسما شريف منير تحذف كلامها على الشعراوي
وحذف المذيعة اسما شريف منير المنشور الذي كتبته عبر حساباتها على مواقع السوشيال ميديا منذ قليل، بعد أن وصفت الشيخ محمد الشعراوي بأنه متطرف ولاقت وابل من التعليقات الحادة والهجوم الشديد عليه، حيث أن اسما شريف منير كتبت: "صباح الخير عايزة اخد رأيك في حاجة، بقالي كتير مش عندي ثقة في اغلب الشيوخ، كتير منهم مدعين ويا متشددين اوي يا خلطين الدين بالسياسة، نفسي اسمع حد معتدل محترم معلوماته مش مغلوطة، لسه في حد كده؟"
اسما شريف منير
الشيخ الشعراوي
وكان سبب هذا الهجوم بعدما كتبت إحدى متابعات اسما شريف منير عبر حسابها بموقع التواصل الإجتماعي "فيسبوك":" طلعي دروس الشيخ الشعراوي من you tube مفيش احسن منه فعلا"، لترد عليها اسما الرد الصادم لمتابعيها: "طول عمري كنت بسمعه زمان مع جدي الله يرحمه ومكنتش فاهمة كل حاجة، لما كبرت شفت كام فيديو مصدقتش نفسي من كتر التطرف، كلام فعلا عقلي ما عرفتش استوعبه، حقيقي استغربت"، وتابعت كلامها: "هدورلك على الفيديوهات اللي خلتني ابطل اشوفوا".
يشار إلى أن اسما شريف منير قامت بإغلاق حسابها على موقع التواصل الإجتماعي "فيسبوك"، وذلك بعد الهجوم عليها بسبب حديثها عن الشيح محمد متولي الشعراوي.