بالفيديو .. « عيش بشوقك » علي الطريقة الكوميدية .. ورد فعل صادم من حسني

بروح المرح والدعابة، قام الملحن الشاب محمد جمال بتصوير فيديو كوميدي لأغنية "عيش بشوقك" التي تحمل عنوان الألبوم الجديد للمطرب تامر حسني، ولكن بكلمات مغايرة لكلمات الأغنية الأصلية، حيث عمل على تعديل كلمات المذهب الأصلي للأغنية، ليصبح "أنا كنت مفلس خالص خالص ومحلتيش أنا جنيه، قولت على الجزمة الباتا اللي أنا لابسها إنها سينيه، مثلت في عز الفقر إن أنا سعادت البيه، وماسيبتش حد يقولي شايل طاجن ستك ليه، عيشتها بدماغي فرحت وقضيت كل التقضيات، قولت أعمل زي ما تامر قالها بقى وأنسى الحسابات، وصرفت اللي في جيبي كله ومخدش في إيديا ساعات، قولي أعمل إيه أنا يا تامر أنا دلوقتي بقيت شحات، ومن جانبه رد حسني على الفيديو مداعباً : "طب ما أنا قايلك من الأول إنك هتشحت".
يذكر أن الفيديو هو فكرة صديقته دينا فكري، ولقى إهتماماً كبيراً من جانب حسني، حيث عمل على إسترجاعه بعد مسحه من قبل إدارة "الفيس بوك" نظراً لحقوق الملكية الفكرية، وهو ما كشفه جمال قائلاً : "الكلام ده والله حصل فعليا وانا مش مزود ولا منقص حرف، ناس كتير بتقول ان تامر حسنى مابيساعدش حد ولا بياخد بايد حد غير قدام الكاميرا وعشان يبان انه بيعمل خير الكلام ده انا مكنتش بقتنع بيه لان احساسى دايما كان بيقولى ان التصرفات دى متطلعش غير من شخص طيب وفعلا مابيحبش يكسر بخاطر حد !! المهم زى مانتو عارفين انا من 10 ايام عملت فيديو هزار كده على اغنية عيش بشوقك وبعد مارفعت الفيديو بساعة تامر شاف الفيديو معرفش وصله ازاى والله المهم بمنتهى التواضع والتقدير كتبلى كومنت عالفيديو .. وكنت فرحان جدا لحد بعدها بكام ساعة الفيديو اتشال طبعا اتضايقت جدا.
وأضاف : المهم بعد اسبوع حاولت بطريقة ما اوصل الموضوع لتامر بطريقة غير مباشرة، كانت محاولة عبيطة كده مكنتش حاطط عليها امل نظرا لصغر حجم الموضوع يعنى انا مجرد واحد من مليون واحد بيعملو فيديوهات بيغنو فيها عالفيس بوك !! المهم رد الفعل صدمنى جدا .. ولاقيت اهتمام من تامر حسنى شخصيا بيقولى ( دى حاجة مش مقصودة طبعا وبالعكس انا حبيت الفيديو جدا .. ابعتلى لينك الفيديو حالا ) مصدقتش نفسى واتكسفت منه وقولتله مش مهم والله كفاية اهتمام حضرتك، رد عليا وفضل مصمم ( ابعتلى اللينك ) وفضل يتابع معايا الموضوع، وانا طبعا محرج منه جدا لحد ما لاقيت تليفون جالى ف ساعتها رديت .. الو يا محمد .. معاك المسئول عن حقوق الملكية الخاصة بتامر حسنى، قولى يا محمد اللى حصل معاك بالظبط .. وانا معاك لحد ما الفيديو يرجع، طبعا الراجل طلع عينه معايا وحاولنا محاولات كتير .. بس نظرا لانى ماخدتش action ساعتها لما الفيديو اتمسح .. فالفيسبوك مسح الفيديو بشكل نهائى ومقدرناش نرجعه !! انا من ذهولي من الموقف مكنتش عارف اقول للراجل ايه ولا اقول لتامر ايه.
وإستكمل قائلا : حد عنده تفسير منطقى ان الراجل ده ف عز ماهو بيعمل دعايا لالبومه وبيكمل تصوير 10 كليبات ومونتاجهم وبيكمل تصوير فيلمه و بيحضر لدعاية فيلمه وبيعمل بروفات لحفلته ف الساحل .. انه يهتم ويدى وقته لشاب عامل فيديو عالفيس بوك مكملش 11 الف مشاهدة !! حد فيكو عنده تفسير لراجل بيعمل ده كله بعيد عن الصحافة والاعلام والكاميرات والبرامج !! .. فيه حد ف مكان الراجل ده مبيكسرش بخاطر حد كده ؟!! كنت مش مستوعب والله والراجل بيقولى ( تامر زعلان جدا ومهتم اوى بالموضوع وقايلى افضل معاك لحد مانرجعه ) !! والادهش من ذلك .. ان تامر بطريقة غير مباشرة وصلى رسالة ( تعبك على راسى يا حبيبى وانا هفضل ورا الفيديو لحد ما يرجع ) .. ايه الاخلاق دى ؟! .. ايه الروح دى ؟! ايه تامر حسنى ده يا جماعة ؟! حقيقى انا موضوعى ده تافه جدا ولا يذكر قصاد الهموم اللى وراه ومش بتنيمه .. ومع ذلك مقصرش واهتم جدا !! وكل ده حصل ومحدش يعرف حاجة غيرى انا وتامر والشخص المحترم اللى كلمنى !! يعنى مفيش حد شافه وهو بيعمل كده !!، من قلبى شكرا تامر حسني، وهرفع الفيديو تانى احتراما لمجهوده واهتمامه هو والراجل المحترم اللى كلمنى .. على الرغم انها مش غلطتهم اصلا .. وغلطتى انا !! وحقيقى اللى حصل ده !! ورد فعل تامر حسنى عندى اهم من مليون فيديو.