من ميدان الشهدا ء لميدان التحرير

طوفان بشر
طالعين ف لحظة ميلاد
مليون قمر
بيقولوا حي ع الجهاد
ليلنا الطويييييل انكسر
يا مصر حابي ع الولاد
عدي المخاض
والشمس نايمة ف قبضتك
شدي بقوة شهقتك
زفي عريسك لما خاض
يا مصر قولي كلمتك
كبّري ف ودن الوليد
لفي البلاد
ينتفض نبض العباد
شدي حيلك يا بلدنا
الثورة طالعة بالنشيد
والشباب السُّمر قاموا
فتّحوا باب الشمس لاخضر
سبّح العصفور وكبّر
يا صباح النصر يا إللي
فوق كتافك شلت حلمي
عمري يوم ما فقدت أملي
إن بكره جي مارد
فارد الجناحات أمان
ألف طاقة بتتفتح لي
في الشوارع والميدان
آه يا قلبي يا سواحلي
الشباب بيزيد إيمان
م المسلة للسويس
الشعب يريد إسقاط النظام
آه يا شعبي لما تغضب
ينكسر ميت ألف قيد
التار هناخده صدقيني
والعزا في بكره الجديد
لما يرحل صاحب السيادة
هو ونظامه البليد
الشعب يريد.. إسقاط النظام
يا سلام يا أَطِبَّا
لما بنداوي الجراح
هي خطوة هبه هبه
يبتدي مليون صباح.
الشعب يريد محاكمة السفاح
البراح الحر نوّر
في البنادر والكفور
والإرادة لشاب أسمر
نبت طينك..
نيل جسور
جاي يقول يا اللا غور.. يا اللا إرحل
يا اللي كاتم ع الصدور
إحنا إيد الله معانا
قوللي مين إللي معاك
مش عايزين من "سام" إعانة
يا إللي عريتوا البلاد
القلوب ف نبض واحد
ينطلق من غير ميعاد
مصر حي علي الكفاح
مصر حي ع الجهاد
صوتها أقوي من القنابل والرصاص
يا إللي خونتوا الدم غوروا
إحنا طالبين الخلاص
إحنا طالبين القصاص
إحنا يا أمه نبت نيلك
إحنا ثورة مُخلصينك
إحنا طين نخيلك
إحنا ناسك..
نبض أهلك
إحنا حراس الحدود
إحنا بإضارة يمينك
لو طلبتي الروح نجود
نفرش الميادين كرامة
نزرع الياسمين دروع
ألف فارس..
ألف مارد
ملايين جنود
وهبوا روحهم للخلود
يا إللي رابضين ف الخنادق
من غير بنادق
بقلب طاهر.. وحس صادق
ويقين متين