(إلي سالي زهران .. شهيدة ثورة 25 يناير) شفت ثوار النهار ده ف الميدان دول ملايكة ربنا لسه نازلين م السما بوشوش بريئه وقلب يحلم بالحنان ف الميدان شفت بنت بضحكه حلوه .. قول جنان شفتها عصفور يزقزق وسط سرب من الحمام كان بيصرخ / ينتفض لجلن ننام ليلنا ف سلام لجلن نعيش بكره ف أمان لجلن يعود للمصري هيبته واحترامه من جديد لجلن يموت الخوف وننطق بالكلام بعد طول الصمت والموت الجبان تاني مره شفتها وسط صاحبتها البنات عقد فل في وسط باقه م الزهور شفتها وسط الشباب طاقه م النور وانفجر صوتها بيرج الميدان قلت مين الحلوه دي؟! - قالوا "سالي" "سالي" مين؟! - بنت زهران اللي ربي "سالي" بنته ع المحبه والنضال وقتها اتمنيت أكون زي "سالي" ولا أصحابها الشباب رحت طفت ف الميدان شفت الصبي ويا الصبيه شفت الكبير ويا الصغيّر شفت ستات البيوت ويا الشيوخ شفت التبرج النقاب شفت الهلال ويا الصليب كلهم جوا الميدان قلب واحد ضمهم صوت بيجمع حلمهم زي الآدان شفت "سالي وسطهم زي القمر لما يضوي علي الغيطان رافعه ايد بتهتف للوطن والتانيه مرفوعه بعلم وقتها قلت خلااااااااص هي مصر بتتولد لحظه وانفتحت جهنم ع الميدان كات عيون الغدر بتحوم ف المكان "سالي" وقعت ف الميدان بس كات حاضنه العلم وف عيونها ضحكه حلوه لبكره جي "سالي" كانت رمز حي لثوره بيضا قاموا بيها أبطال شباب هما دول مصر الحقيقه هما ثوار النهار ده اللي جابوا أغلي نصر لأمنا الحلوه مصر.