إلي من أنشأني تماما عكس ما يريد إلي أبي

نقطة
كان أول مرة التليفزيون يدخل في حارتنا
أمي بعتتني ويا عيال الحارة
نتفرج ع.... الأملة
ع الحلم الطازة اللي اسمه.... التليفزيون
بعد شويه.... طردوني
فرجعت البيت.. مفحوم بعياطي .... ونمت
لكن هوه ما نمش... بعد شويه صحاني
فلاقيته جايبلي تليفزيون.... زي بتاعهم بالظبط
نقطة كمان
كان عامل في مصانع
بتصنع احذية و تصدرها لروسيا
وف يوم
جاتله مكافأة جودة انتاج
ما انساش يومها
وهوه بيعزم كل الحارة _ رجالة وستات _ ع السيما
سوزي با ئعة الحب
مش ممكن انسي قعدتنا ملوك
وسط صفوف السيما الستة
اللي عزمهم.... يومها
النقطة التالتة
في شهادة الابتدائية
جبت 183من أصل 200
ما ضحكش..... ولا قالي.. برافو عليك
علشان ابن جراننا جاب 185
صحاني..... الساعة 7 الصبح
وأخدني معاه......... ع الورشة
ما رضيش حتي يشغلني... معاه
شغلني.... مع واحد صاحبه
وسمعته بيوصيه... مرمطه ع الاخر
قضيت أسوأ اجازاتي
من سبعه الصبح لما لسبعه بالليل
بتمرمط في شوارع.... الصيف مستقصدها
والحر بياكل مني ومنها رقات
كنت ببات...
أحلم باللعب مع أصحابي
أو حتي مع الاغراب
شفت عذاب
خلاني أتمني... بس إني أمشي.... في شارع ضل
وف اعدادي
كنت باذاكر بس..عشان مش عايز احس
إن اللعب........ واحشني
في الآخر... جبت 285 وصاحبنا جاب 190
في نهاية مشوارنا
أنا رحت الثانويه العامه... واتخرجت م الجامعه
وهوه.............خد دبلوم
سيل
قفلوا المصنع.... لما قطعنا علاقتنا بروسيا
السيل التاني
ست البيت.... نزلت.......ع الشغل
كنت باشوفك..... مكسور
بس هتعمل ايه
ما انت لأول مرة......العاطل
ولأول مره
بتجرب....احساس ... ست البيت
طوفان
عيل يطلب منك حاجة
فتكور اذلالك... جواك...وتداري.... عينيك
وانت بتقول له
استني.. لما امك ترجع مالشغل
يا ا ا ا ا با
أنا طالب منك....... تسامحني
اكمني بقيت.... كل اللي انت ما اتمنتهوش
بس انت
انت اللي رمتني........... في حضن الساسة
انت اللي سقتني.......... من صغري سياسة
خليت عيني... تشوف الظلم...... وما تقبلهوش
ورتني.... مرارة ايامنا.... من غير اي رتوش
بس اللي ما تعرفهوش
ان انكساراتك.....علي قد ما خنقتني....... خلقتني
شفتها ......سيل..... ورا سيل
فكرهت خضوعك..... اّسف...... ما فهمتوش
فكرت إن الجهل سبب ذلك...........فبقيت...اقرأ بإيديا وسناني
حسيت ان صلاتك رمز خضوعك...........ما بقتش اصلي
شفت اللي حصل لي
عشنا..... مختلفين
تنصحني...... أعصاك
أنا لازم أكون... أيها واحد....... الاك
فبقيت...... زي ما انت عايزني..... من جواك
حتي خلافي معاك..... كان من جواك
أنت.... بتتمنالي........ الجنه
وأنا نفسي... أعملهالك.... ع الأرض
ابنك