و كأي أعمي

لو كان المطر ينزل بأمري
كنت ألم بيوت شارعنا
واستخبي ويّا روحي
... و يّا روحي
أبطل ألعب استغماية الليلة دي
ولا اتكسفش من انتظاري
الساعة تمشي
أنا اللي مستني من سنه
أو يجوز أكتر شويه
دوري في الطيران وحيد
ولا أي سرب إلا ويخاف
وأنا الوحيد اللي باطلع
لأعلي فوق كمان
وعمري ما سمعت الكلام
إن اخرة المرجيحة تنزل
مشكلتي :
إني لما بابكي
محدش بيحس بيا
المطر محتاج إله
محتاج حد يفهِّمه:
اني محتاجُه ينزل دلوقت حالا
... فأبان كبير
محتاج لمرجيحة أعلي
و محتاج حاجات كتير
مثلا... أنا
محتاج إني ألقاني
رغم الزحام منتبه للشرح
وأنا الأخير
أنا اللي مش عارف أطير
و لا باعرف اطلع النخله
صورتي اللي في البرواز
لا تشبهني ولا اشبهها
تهم كتيرمنها : كلامي لروحي لامؤاخذه
وكل الخلق بتشوفني
باغني ف السكك وحدي
بنادي بيبان السما تفتح
وكأي أعمي
أنا اللي خفت م الضلمه
وأنا مروح